Madison Dastrup hefur vakið athygli á samfélagsmiðlum eins og TikTok og YouTube þar sem hún fjallar aðallega um líf sitt sem húsmóðir. Madison er rétt rúmlega tvítug og hefur mörgum fundist furðulegt að hún sækist í svo íhaldssamt hlutverk. Sem húsmóðir þá sér Madison um heimilið á meðan eiginmaður hennar sér um að vinna til að afla tekna. Madison og eiginmaður hennar trúlofuðust þegar þau voru 18 ára gömul og giftust svo ári síðar. Þegar þau voru 21 árs gömul fluttu þau út saman og eignuðust fyrsta barnið sitt í kjölfarið.
Á TikTok ræðir Madison mikið um hlutverk sitt sem húsmóður en hún segist alltaf hafa langað að eyða lífinu sem slík. „Það að elda fyrir eiginmanninn minn er mín leið til að sýna honum hvað ég er þakklát fyrir allt sem hann gerir fyrir fjölskylduna okkar. Með því að elda uppáhalds matinn hans þá sýni ég honum að ég er að hugsa um hann,“ segir hún til að mynda í einu myndbandi á samfélagsmiðlinum.
Eins og áður segir þá hafa myndbönd þessarar ungu húsmóður vakið athygli en The Sun fjallaði til að mynda um hana og myndböndin hennar. „Að geta verið heima og gera alla þessa litlu hluti til að þjóna þeim sem eru í kringum mig veitir mér svo mikla hamingju,“ segir Madison en hún segir að eiginmaður hennar hafi ýtt henni út í að vera betri og duglegri sem húsmóðir.
„Hann sagði við mig að ég þyrfti að gera betur, þið ættuð ekki að láta það þurfa að gerast,“ segir Madison. „Eftir að hann talaði við mig gerði ég mér grein fyrir því að ég þyrfti að gera betur og síðan þá hef ég ekki litið til baka, ég er orðin að eiginkonunni og móðurinni sem mig langaði alltaf að verða.“
Madison hefur einnig vakið athygli á TikTok fyrir skoðanir sínar á femínisma en hún segist vera á móti þeirri hugmyndafræði. „Femínismi í dag er brandari,“ segir hún til að mynda í einu myndbandi. „Femínismi í dag fer á móti því sem femínistar fortíðarinnar stóðu fyrir. Þeim finnst karlmennska vera eitruð og ég neita að vera hluti af því. Þær segjast alltaf styðja konur en svo þegar konur vilja vera húsmæður þá er það ekki lengur staðan. Við erum öll með mismunandi drauma og það er ekkert að því. Draumastarfið þitt gæti verið mín versta martröð.“