Á síðunni Zillow.com birtist fasteignaauglýsing sem í fyrstu lítur út fyrir að vera ósköp venjuleg. Eignin er í Kaliforníu-fylki, rétt við landamærin við Nevada.
Þegar byrjað er að fletta í gegnum myndirnar myndi maður halda að þetta sé bara venjulegt, smá gamaldags hús. Fyrsta sem grípur athygli fólks er líklega bílsætið sem stendur á miðju gólfinu. Einnig er mikið af morgunkorni er á eldhúsborðinu og álpappír er fyrir ofan eldavélina. Það er þó ekki fyrr en þú ert rúmlega hálfnuð/aður með myndirnar þegar hlutirnir byrja að verða virkilega skrítnir.
Eftir að hafa séð svefnherbergi þar sem rúmið er yfirfullt af fötum og loðna klósettsetu þá mætir þú aftur í stofuna og þar blasa við þér sjö gínur, allar klæddar í glimmerkjóla og með hárkollur. Hver mynd er skrítnari en sú á undan og bætast í hópinn liggjandi gína á baðherbergisgólfinu, barnagína í barnagrind og gínu í jakkafötum með lás um hálsinn. Alls taldi blaðamaður um 24 mismunandi gínur á ljósmyndum fasteignasölunnar.
Viljir þú skoða þessa mögnuðu eign sem fæst á 650 þúsund dollara eða rúmlega 83 milljónir íslenskra króna miðað við gengi dagsins, þá getur þú séð hana hér.
