Verðlaunarithöfundurinn Óskar Guðmundsson var að senda frá sér fjórðu glæpasöguna Dansarinn. Hún kom samtímis út hjá Storytel sem hljóð- raf- og innbundinn bók og komin í allar helstu verslanir. Það er óhætt að segja að þessi nýi sálfræðitryllir hafi slegið í gegn en sem dæmi þá hefur Dansarinn setið í efsta sæti vinsældarlistans á Storytel frá því hún kom út 11.nóvember. Þegar þetta er ritað þá hafa um 6000 notendur hlustað á hljóðbókina eða eru með hana í lestri og rúmlega eittþúsund gefið henni stjörnugjöf. Óskar segir það hafa verið nýja og ánægjulega upplifun að aðeins degi eftir að Dansarinn kom inn til hlustunnar, þá hafi strax farið að hrannast inn umsagnir notenda.
Aðspurður segir Óskar að sköpunarferlið bókarinnar hafi verið með ólíkindum. „Sagan er óvenjuleg að því leiti að í fyrsta lagi er um mikinn harmleik að ræða hjá hinum unga ballettdansara Tony sem er aðalpersóna sögunnar. Hann elst upp hjá drykkfelldri og sjúkri móður sinni sem hafði eitt sinn verið helsta vonarstjarna Íslands í ballett. Frá unga aldri hefur hún þjálfað Tony í einangrun til að taka við keflinu og notar við það grimmilegar aðferðir sem leiða af sér skelfilega atburði. Í öðru lagi þá tók ég þá ákvörðun að fela ekki morðingjann líkt og ég gerði í fyrri bókum mínum. Ef ég hefði kosið þá leið þá hefði það takmarkaði verulega möguleika mína á að segja sögu drengsins. Hann er því öllum sýnilegur í upphafi sögunnar,“ segir Óskar. Lesendur fá einnig að kynnast rannsóknarlögregluparinu Valdimari og Ylfu en þau eiga eftir að koma við sögu í næstu bókum Óskars þar sem hann hefur nú þegar skrifað undir samning að næstu tveimur bókum í þríleiknum sem gætu þó orðið fleiri með lögregluparinu.
Það óvenjulegasta í ferlinu var að Óskar fékk þá hugmynd að fá til liðs við sig tónlistarmennina Daníel Ágúst, Doctor Victor og Bomarz til að semja lag sem ætti í samtali við Dansarann. „Þetta var stórkostlegt ferðalag,“ segir Óskar. „Þau hjá Storytel samþykktu hugmyndina og ég fékk tækifæri til að fylgjast með laginu fæðast frá grunni til enda og ekki nóg með það, heldur var ákveðið að gera myndband sem að mínu mati er algjört listaverk.“
Lagið hefur fengið gríðarlega spilun bæði á Youtube og Spotify. Youtube-myndband lagsins er í spilaranum hér fyrir neðan.