Hafdís Huld og Alisdair Wright náðu á dögunum þeim undraverða árangri að fá tvöfalda platínuplötu fyrir plötuna Vögguvísur. Vögguvísur kom út árið 2012 og náði fljótlega miklum vinsældum. Síðan þá hefur ekkert lát verið á vinsældum plötunnar sem endurspeglast meðal annars í því að árið 2020 var Vögguvísur mest selda plata landsins.
Þá hafa lög á plötunni verið tíðir gestir inn á lista yfir vinsælustu lögin á Spotify á Íslandi. Til að mynda er lagið „Dvel ég í draumahöll“ í sautjánda sæti yfir vinsælustu lög landsins þegar þessi orð eru skrifuð. Það er því nokkuð ljóst að foreldrar um land allt nýta sér ljúfa tónlist Hafdísar Huldar og Alisdair þegar róa þarf börn landsins.
Platan hefur selst í yfir 20.000 eintökum og fær því viðurkenningu sem er staðfest af Félagi hljómplötuframleiðenda.
