Það er óhætt að segja að íbúar svokallaðra „kynlífshúsa“ í Brooklyn í Bandaríkjunum séu orðnir gramir eftir tíu mánaða samkomubann.
„Ég myndi gefa vinstra eista mitt til að komast í orgíu,“ segir Kenneth Play, annar stofnandi Hacienda Villa, í samtali við New York Post.
Hann er einn af rúmlega þrjátíu íbúum, á aldrinum 20-45 ára, sem búa í þremur húsum í eigu Hacienda kynlífsklúbbsins. Húsin eru Villa-húsið, Lodge-húsið og Tower-húsið. Að íbúum húsanna meðtöldum eru 700 meðlimir í klúbbnum.
Áður en kórónuveirufaraldurinn skall á héldu íbúar orgíu um einu til tvisvar sinnum í mánuði. Hundruðir klúbbmeðlima mættu í svöllin, döðruðu, fóru í heitan pott og skemmtu sér saman. Hver íbúi hefur sitt eigið herbergi, en þeir deila svo eldhúsi, stofu og baðherbergjum.
Árið 2019 hélt klúbburinn nítján orgíur og 45 aðra viðburði. Í fyrra tókst þeim aðeins að halda fimm orgíur áður en Covid setti strik í reikninginn.
„Kynferðisleg einangrun er mjög erfið,“ segir Violet, íbúi kynlífsklúbbsins í samtali við NY Post. „Við gátum ekki einu sinni hitt nýtt fólk, þannig það var mikil aukning á sjálfsánægju.“
Maður, sem kýs að koma í skjóli nafnleyndar og kallar sig „Mr Play“ segir: „Árið 2019 átti ég um hundrað elskhuga, árið 2020 var sú tala um fimm.“
Reglur
Kynlífshúsin eru hvert með sínar reglur. Í Villa-húsinu mega herbergisfélagar ekki stunda kynlíf saman. En það er engin slík regla í Lodge-húsinu.
Starfsstéttir íbúanna eru eins fjölbreyttar og þær eru margar. Þeir vinna meðal annars í fasteignageiranum, fjármálageiranum, markaðsmálum, listheiminum, heilbrigðisgeiranum og verkfæraverslun.
Covid hafði þó áhrif á íbúa húsanna sem voru ósammála um hvaða skref þyrfti að taka til að tryggja öryggi allra. Það endaði með því að tveir íbúar fluttu í burtu.
Það er enn leyfilegt að fá gesti, til að stunda kynlíf með eða eitthvað annað, en íbúar eiga að fara varlega og gæta öryggis eftir bestu getu.
Þetta hefur þó reynst íbúunum afar erfitt.
„Þegar þú ert með hóp af félagsfiðrildum sem njóta þess að stunda kynlíf, þá er samkomubann einstaklega erfitt,“ segir Mr Play.
Fólk innan senunnar hefur leitað ýmissa leiða til að eiga skyndikynni og fara í orgíur. Sumir hafa farið til Mexíkó, þar sem reglur eru ekki eins strangar, aðrir hafa farið í upphéruð New York eftir að hafa fengið neikvætt úr Covid prófi.
„Síðasta ár hefur verið einangrandi og ég hef saknað þess að vera snert,“ segir ein kona sem fór í slíka orgíu. „Sem betur fer var ég snert, mikið, þessa helgi.“
Hacienda kynlífsklúbburinn hefur gripið til sinna ráða, haldið orgíur á netinu og boðið upp á nektarjóga á netinu.
Meðlimirnir horfa björtum augum til framtíðarinnar í von um að þau geti fljótlega farið að skemmta sér að nýju.