Laura Amherst er 31 ára stjórnmálafræðinemi sem hefur undanfarið ratað nokkuð oft í breska fjölmiðla. Ástæðan fyrir viðveru hennar í fjölmiðlum hið ytra er sú að hún mætir reglulega á loftlagsmótmæli í Bretlandi og er oftar en ekki ber að ofan á meðan hún mótmælir. Amherst er hluti af hópnum Extinction Rebellion sem hefur haldið áberandi mótmæli í Bretlandi síðustu vikur, mótmælin ganga oft lengra en önnur mótmæli í sama málaflokki. Hópurinn er þekktur fyrir borgaralega óhlýðni sína á mótmælum en tekur skýrt fram að hann er á móti ofbeldi af öllu tagi.

Í kjölfarið á umfjölluninni um Amherst þá hefur fylgjendum hennar á samfélagsmiðlinum Instagram fjölgað ört. Með fleiri fylgjendum fylgir þó oft hatur og var það raunin í tilfelli hennar. Nýlega hefur hún verið að fá mikið af skilaboðum frá fólki sem er að fitusmána hana. Amherst birti í kjölfarið færslu þar sem hún sagðist ætla að ganga lengra í mótmælum sínum. Nú ætlar hún að sýna hætturnar við fitusmánun og hefur hún því ákveðið að fara í hungurverkfall í heila viku.

„Karlmaður hér á Instagram reyndi að fitusmána mig í dag, hann talaði um að hann vildi ekki sjá fellingarnar á líkamanum mínum. Svo hérna er ég að birta mynd af appelsínuhúðinni minni líka til að halda honum ánægðum!“ segir Amherst í færslunni sem um ræðir en færsluna má sjá hér fyrir neðan.

 

View this post on Instagram

 

A post shared by Laura amherst (@lauraamherstxr)

„Ég stend ekki fyrir fitusmánun eða kvenfyrirlitningu af neinu tagi. Ég stend fyrir líkamsvirðingu og fagna og kann að meta kvenkyns líkamann í öllum birtingarmyndum hans,“ segir Amherst og tekur svo skýrt fram að hún er einnig á móti fitusmánun á öðrum kynjum. „Ég dæmi ekki neinn fyrir líkama sinn og mér finnst ógeðslegt þegar fólk gerir það.“

Þá varaði hún fólk við því að gera grín að útliti annars fólk og benti á hættuna sem það getur haft á þá sem glíma við átraskanir. „Mikill fjöldi fólks lætur lífið af völdum átraskana á hverju ári.“

Amherst segir svo fylgjendum sínum að hafa ekki áhyggjur af hungurverkfallinu þar sem hún hefur áður verið án matar í heila viku. Þá tengdi hún hungurverkfallið líka við loftslagsmótmælin. „Ég er líka að gera þetta til að vekja athygli á því sem mun gerast ef vistkerfið okkar fer í rúst og við getum ekki framleitt eða dreift nóg af mat til landanna í heiminum.“