Fátt er jafn mikið myndað um þessar mundir og eldgosið í hlíðum Fagradalsfjalls en nú virðast Kaleo hafa tekið hlutina skrefi lengra og tekið þar upp tónlistarmynd við lag sitt „Skinny.“

Myndbandið má sjá hér neðst í fréttinni.

Í tilkynningu frá sveitinni segir að lagið sé það fimmta sem gefið er út af komandi plötu sveitarinnar en á henni er von í lok næstu viku.

Myndbandið við lagið var svo tekið upp á gossvæðinu aðeins örfáum dögum eftir að gos braust þar út um miðjan mars. „Venjulega þegar KALEO skipuleggja tökur á svona myndböndum eru oft margir mánuðir sem fara í undirbúning en það var þó ekki hægt núna,“ segir í tilkynningunni. „Enginn vissi hve lengi eldgosið myndi standa og því ekki hægt að leyfa sér of mikinn tíma til undirbúnings. Allir sem komu að gerð myndbandsins unnu mikið þrekvirki með að labba með allan þann búnað sem þurfti fyrir tökurnar á tökustað og vinna yfir nótt í fimbul kulda.“

Sjón er sögu ríkari: