Kona fann gamlar dagbækur eiginmanns síns og komst að leyndarmálum hans. Hún leitar ráða til kynlífs- og sambandsráðgjafa The Sun, Dear Deidre.

„Ég var að taka til í geymslunni og fann gamlar dagbækur. Mér til mikillar skelfingar komst ég að því að hann hefur margsinnis haldið framhjá mér. Ég skoðaði þá símann hans og komst að því að hann er ennþá að halda framhjá mér. Við erum bæði 52 ára og höfum verið saman í 25 ár,“ segir konan.

„Ég hélt að hjónaband okkar væri sterkt, við höfum meira að segja talað um það þegar vinapör okkar hafa hætt saman,“ segir hún.

„Ég féll niður til jarðar þegar ég las dagbækurnar. Ég var í svo miklu áfalli og átti erfitt með að trúa því sem ég var að lesa. Hann hafði skrifað niður öll smáatriði, hvenær hann hitti konurnar og hvað þau gerðu. Á þessu augnabliki hrundi veröld mín,“ segir konan.

Hún vildi vita hvort hann væri ennþá að halda framhjá henni og skoðaði símann hans.

„Ég fann nokkurra daga gömul skilaboð frá annarri konu. Ég veit ekki hvernig ég fann hugrekkið, en ég hringdi í konuna. Ég sagði henni hver ég væri og hún reyndi ekki einu sinni að neita fyrir þetta. Hún sagði að þau hafa verið að sofa saman í ár og henni var sama að ég var í uppnámi,“ segir konan.

„Ég talaði við eiginmann minn um þetta og við fórum bæði að gráta. Hann var með útskýringar á öllu og sagði að konurnar hefðu enga merkingu fyrir honum. Þetta snerist allt um skammtímaskemmtun. Hann sagðist hafa fengið samviskubit að hafa haldið framhjá mér og þess vegna hætt að hitta konurnar. Hann hefur reynt að bæta mér þetta upp en ég get ekki fyrirgefið honum þetta og gleymt þessu svona auðveldlega. En við erum byrjuð hjá hjónabandsráðgjafa. Hann vildi ekki fara en ég sagði honum að ég þyrfti þess eftir að hafa lesið dagbækurnar hans. Hjarta mitt er í sárum, ég skil ekki hvernig hann gat gert mér þetta. Ég elska hann ennþá en ég veit ekki hvenær ég mun komast yfir þetta, eða hvort ég muni einhvern tíma gera það,“ segir konan.

Deidre bendir henni á að ef eiginmaður hennar hefur verið að halda framhjá henni eftir að kórónuveirufaraldurinn hófst þá hefur hann verið að setja heilsu hennar í hættu á sama tíma og hann hefur verið að særa hana.

„Það er oft sagt að ef manneskja heldur einu sinni framhjá þá sé eitthvað að sambandinu, en ef hún heldur mörgum sinnum framhjá þá er eitthvað að henni. Vertu ákveðin við eiginmann þinn, hann getur ekki bara sagt fyrirgefðu og búist við að allt verði eðlilegt aftur. Það getur verið að hann haldi framhjá vegna slæmra minninga sem verður erfitt fyrir hann að ræða. En hann verður að vinna í tilfinningum sínum ef þú átt geta treyst honum aftur. Haldið áfram í hjónabandsráðgjöf,“ segir Deidre og ráðleggur konunni að gefa sér tíma í að endurmeta stöðuna.