Líkt og DV greindi frá í dag þá hefur Íslandsstofa, í gegnum átakið Inspired by Iceland, hrundið af stað sérstæðu markaðsátaki sem felst í því að bjóða fólki út um allan heim að láta öskur sitt hljóma í gegnum sjö hátalara sem verða staðsettir víðsvegar um landið.
Ekki virðast allir sáttir með þetta átak, en fjöldi Íslendinga haf tjáð sig um það á samfélagsmiðlum. Þar hefur átakið bæði verið kallað hallærisleg og taktlaus.
Fjölmiðlamaðurinn Egill Helgason tjáði sig um málið á Facebook-síðu sinni, þar sagði hann að auglýsingin væri plebbaleg úr takt við lífið í landinu.
Skemmtikrafturinn og leikarinn Vilhelm Neto gerði grín að auglýsingunni á Twitter. Hann minntist á að líklega hafi margir Íslendingar hugsað spenntir til þess að geta ferðast um landið án þess að verða fyrir truflunum frá túristum, sú upplifun gæti þó breyst með þessum hátölurum.
“Loksins hægt að ferðast innanlands án þess að of margir túristar séu þar og læt…. pic.twitter.com/CvDnUYATss
— Vilhelm Neto (@VilhelmNeto) July 15, 2020
Meðlimir í Facebook-hópnum Markaðsnördar voru einnig spurðir út í álit sitt á málinu, þar voru skiptar skoðanir á málinu. Annars vegar fannst fólki auglýsingin slæm, hins vegar fannst öðrum hún góð þar sem hún væri að vekja athygli og umfjöllun. Hér að neðan má sjá nokkur ummæli sem finna má í hópnum.
„Á meðan málfrelsi er enn á Íslandi þá leyfi ég mér að segja : Hvað var þetta lið að reykja?“
„Ég sá þetta í Kálfhamarsvík og hélt að maður gæti tengst þessu sjálfur og spilað músikk. Sem hefði verið algjör snilld, sérstaklega á fáförnum stöðum. Þetta öskur bull er ömurleg hugmynd.“
„Ég er í nokkrum erlendum ferða-grúbbum á facebook og þar er fólk að tala mjög jákvætt um þetta.“
„Umfjöllun er eitt, en hvort það skilar sér í auknum ferðalögum hingað til lands er annað. Ef ég hefði áhuga á því að komast úr ys og þys borgarlífsins, eða úr einangrun vegna covid í slökun á Íslandi væru öskur við ferðamannastaði ekki beinlínis til að hvetja mig til þess.“
„Getið rétt ímyndað ykkur hvað fólkið á internetinu á eftir að öskra í þessa hátalara. Þetta er svo galin hugmynd.“
„Ég hugsa að þessi hátalara-hugmynd sé hönnuð gagngert til að næla sér í fyrirsagnir og svona pósta.“
„Mér finnst þessi herferð nokkuð sniðug bara. Interactiv á einfaldasta máta, auð mælanleg, öðruvísi, eftirtektarverð etc. En sko, það eru allir búnir að skolla lengra áður en hún nær athygli á einhvern hátt, eða er ég einn um gefa svona hlutum gríðarlega stuttan tíma til að grípa mig á vafri internetanna?“
„Nokkuð viss um að ef svona hátalari væri á stað sem ég myndi heimsækja eða skoða þá myndi ég einfaldlega slökkva á honum.“
