Mikið úrval er af verslunum á Íslandi sem sérhæfa sig í hjálpartækjum ástarlífsins. DV kannaði markaðinn og athugaði hvaða vörur væru vinsælastar hjá þeim sem vilja smá (eða dúndurmikið) krydd í kynlífið.
Það má með sanni segja að sogtæki af ýmsu tagi toppi listann, en um er að ræða tæki með ýmsum sogstillingum sem ku veita mikinn unað, hvort sem þau eru notuð á sníp og barma eða endaþarm. Meðal þeirra vinsælustu eru tæki sem bæði sjúga og titra – tvöföld gleði!
Einnig eru „strap-onar“, beisli með gervilim sem konur geta smellt á sig, afar vinsælir og einnig svokallað „anal plug“ sem veitir, eins og nafnið gefur til kynna, unað í endaþarm. Því virðist sem Íslendingar séu farnir að kanna endaþarminn sífellt meira í kynlífi, sem sést best á því að mest selda vara kynlífstækjaverslunarinnar blush.is árið 2019 var einfaldlega sleipiefni, sem er þarfaþing ef gleðja á afturendann.
Meðal þess vinsælasta hjá blush.is er Womanizer Premium, tæki sem örvar snípinn með sogtækninni. Tólf mismunandi stillingar, allt frá léttri snertingu yfir í kraftmikið sog fyrir lengra komna. Ekki skemmir fyrir að tækið er afar hljóðlátt og því engin hætta á að mótorhljóðin veki heimilisfólkið.
Þeir sem hafa minna á milli handanna og geta ekki splæst í Womanizer-vörurnar geta kíkt á tantra.is á Satisfyer Pro 2 Next Generation. Sú vara er svipuð Womanizer, nema mun ódýrari, og sagan segir að sogið úr þessu tryllitæki færi konum alsælu, hvar og hvenær sem er, þó ekki eins hljóðlátlega og Womanizer.
Satisfyer Men Masturbator Heat Vibration er tækið með langa nafnið og mikla unaðinn. Það fæst hjá hermosa.is og kallast á íslensku einfaldlega múffa. Múffa þessi er með þrjár hitastillingar og sjötíu titringsstillingum svo allir karlmenn ættu að finna stillingu við hæfi. Upplifun fyrir karla ku vera lík því að stunda kynlíf með manneskju.
Vinsæl vara hjá bæði hermosa.is og tantra.is er Partner Plus og smellpassar hún í paraleikinn. Tækið er vatnshelt og því hægt að taka það með í bústaðinn, en því fylgir einnig fjarstýring sem þýðir að hægt er að leika sér með litla leyndarmálið í mannfagnaði án þess að nokkur þurfi að vita. Tækið örvar G-blettinn og snípinn og virkar í flestum stellingum. Nú er bara að nota ímyndunaraflið!
Hedy Svakom er vinsæl, einnota runkmúffa hjá blush.is. Það þarf líklegast ekki að fjölyrða um kosti hennar.
Erótíska nuddtækið Nalone Roma fæst hjá amor.is. Sex titringsstillingar og beygjanlegur silíkonhaus vinna ötullega að því að bæta, hressa og kæta. Ekki láta stærðina blekkja því krafturinn er kynngimagnaður.
Drottning sogtækjanna er Queen Pulse Wave-settið frá Zalo sem fæst hjá hermosa.is. Um er að ræða titrara sem hægt er að breyta í sogtæki – það besta úr báðum heimum. Hægt er að tengja tækið við síma og láta það titra eftir tónlist eða láta makann hafa völdin.
Hjá bæði blush.is og tantra.is er endurhlaðanlegi typpahringurinn frá Winni Svakom gríðarvinsæll en hann er kraftmikill, með titringi og sérstaklega hannaður fyrir pör. Typpahringurinn auðveldar karlmönnum að halda stinningu en getur einnig hentað sem egg. Þessi kemur með fjarstýringu – en ekki hvað?
Hið byltingarkennda Zalo Hero-tæki hjá hermosa.is er búið þeim eiginleika að „tungan“ á tækinu getur hreyft sig fram og til baka allt að 75 sinnum á sekúndu og líkir því eftir munnmökum. En bíðið, það er meira! Tækið er líka hægt að nota sem titrara eða egg.
Eins og áður segir eru gervilimir sem kona festir á sig að slá í gegn hjá landanum. Þeir sem eru að stíga sín fyrstu skref í þeim efnum geta keypt byrjendasett hjá hermosa.is og unnið sig upp í keppnistýpur.
