Leikkonan og rapparinn Þuríður Blær Jóhannsdóttir er nýjasti gestur Einkalífsins á Vísi. Hún hefur slegið í gegn að undanförnu fyrir hlutverk sitt sem Hrefna í þáttunum Ráðherrann en margir þekkja hana einnig úr rappsveitinni Reykjavíkurdætur.
Þuríður Blær, eða Blær eins og hún er ávallt kölluð, leikur á móti Ólafi Darra og Anítu Briem í þáttunum. Ólafur Darri og Aníta eru bæði mjög reyndir leikarar og segist Blær hafa lært mikið af þeim. „Það sem ég tók mest frá þeim er hvað þau eru skemmtileg á [tökustað],“ segir hún í Einkalífinu.
Blær viðurkennir að hún hafi verið mjög stressuð áður en fyrsti þátturinn kom út, enda eitt og hálft ár liðið frá tökum og margt búið að gerast í hennar lífi. Hún missti föður sinn seint á síðasta ári og eignaðist son í júní síðastliðinn.
Faðir Blævar var útigangsmaður mest alla ævi sína, glímdi við fíkn og geðræn vandamál. Aðspurð hvernig það hafi mótað hana sem manneskju segir Blær:
„Sko, ég vil nú alltaf meina að þetta hafi ekki allt of mikil áhrif á mig, því hann var ekki mikið á heimilinu. En þetta hefur auðvitað áhrif á mann, þó maður vilji ekki viðurkenna það fyrir sjálfum sér. Þetta er partur af því að ég á auðvelt með að sækja sorg og tilfinningar sem kannski ekki allir á mínum aldri eiga til inni í sér, ekki strax. Ég missti hann líka á seinasta ári, þannig að ég held að þetta hefur þroskað mig mjög mikið og gert mig sterka að mörgu leyti, en þetta gerir mig líka kvíðnari.“
Blær eignaðist son sinn, Arnald Snæ, þann 13. júní með kærasta sínum Guðmundi Felixsyni. Hún segir að það hafi verið skrýtið að eignast barn á tímum Covid en sem betur fer hafi fæðingin einmitt átt sér stað á milli fyrstu og annarrar bylgju hér á landi.
„[Guðmundur] mátti vera með mér alla fæðinguna og á sængurdeildinni. Sem var frábært því ég var svo búin á því, ég hefði ekkert getað verið þarna ein,“ segir Blær.
Horfðu á þáttinn í heild sinni hér að neðan.