Louise Hosie, frá Skotlandi, var í áfalli þegar hún sá hvað dóttir sín hafði tekið með í skólann til að nota sem handsótthreinsi. Hin fimm ára Summer hafði tekið sleipiefni móður sinnar með sér í skólann, talið það vera sótthreinsi og notað það yfir daginn.
Louise fann sleipiefnið í úlpuvasa dóttur sinnar og spurði hana út í það. Summer svaraði sakleysislega og sagðist hafa viljað fylgja sóttvarnarreglum. Louise segir í samtali við Fabulous Digital að henni hafi þótt þetta vandræðalegt og sprenghlægilegt í senn.
Sleipiefnið er frá fyrirtækinu Ann Summers, og hefur dóttir hennar örugglega haldið að það væri fyrir hana. „Af því að hún heitir Summer og það stendur Ann Summers á flöskunni, þá hefur hún haldið að hún ætti það,“ segir Lousie.
„Ég velti því strax fyrir mér hvort kennararnir hefðu séð sleipiefnið og ég dauðskammaðist mín. En ég áttaði mig svo á því að ef þeir hefðu séð það, þá hefðu þeir örugglega tekið það af henni,“ segir hún.
„Summer sagðist hafa verið hrifin af efninu, þar sem það hitaði hendurnar hennar og var mjúkt. Hún sagðist einnig hafa sótthreinsað hendur vina sinna.“
Louise er spennt að deila sögunni með Summer þegar hún verður eldri. „Þetta verður fyndin saga þegar hún verður átján ára,“ segir hún.