„Þetta hefur lengi blundað í mér,“ segir Ásta Guðrún Helgadóttir, fyrrverandi alþingismaður Pírata og einn af eigendum kaffihússins Forsetans sem opnar á Laugavegi 51 í dag, föstudag. Eins og nafnið gefur til kynna munu núverandi og fyrrverandi forsetar prýða veggina.
„Þetta er svona lítið fjölskyldufyrirtæki, ég og pabbi erum í þessu saman,“ segir Ásta Guðrún í samtali við DV en segist hafa stokkið á tækifærið þegar húsnæðið á Laugavegi bauðst til leigu fyrir nokkrum vikum. Í kjölfarið var ráðist á framkvæmdir á mettíma, með dyggri aðstoð vina og vandamanna. Ásta segir þó lítið hafa verið lagt í innréttingar og kostnaðurinn við framkvæmdirnar í algjöru lágmarki. Hún grínast með að staðurinn eigi að vera nokkurs konar pólitískur sportbar. „Svona staður þar sem fólk getur rætt málefni líðandi stundar, horft á kosningavökur og spjallað um pólitík.“
Staðurinn mun eingöngu vera með drykki til að byrja með og lagt er upp með að bjóða upp á íslenska framleiðslu: kaffið kemur frá Kaffibrugghúsinu á Granda og ölið kemur frá Dokkunni brugghúsi á Vestfjörðum. „Við erum sjálf lítið fyrirtæki og viljum styðja við íslenska nýsköpun,“ segir Ásta en Forsetinn mun opna dyrnar kl 17 í dag. „Að því gefnu að bjór og kaffidælurnar komist í gang!“