Tónlistarmaðurinn Magnús Gunnarsson býr í Los Angeles í Kaliforníu. Hann hefur búið þar undanfarin ár og fór þar í tónlistarskóla. Í samtali við DV lýsir hann ástandinu í Kaliforníu vegna útbreiðslu kórónuveirunnar. Hann segir að það sé búið að loka öllum almenningsströndum og allur klósettpappír sé uppseldur.
Magnús gaf út nýtt lag og tónlistarmyndband á fimmta degi sóttkvíar í Kaliforníu. Lagið fjallar um kórónuveiruna og lífið í einangrun. Þú getur hlustað á lagið og horft á myndbandið neðst í greininni.
https://www.instagram.com/p/B95UhbYll26/
Staðan í Kaliforníu
„Þar sem ég á heima hafa allir skólar, ræktarstöðvar, barir, veitingahús, kvikmyndahús og fleira verið lokað í rúmlega viku,“ segir Magnús í samtali við DV.
„Fyrir helgi tilkynnti ríkisstjóri Kaliforníu að Kaliforníubúar skyldu halda sig heima nema brýna nauðsyn beri til annars. En fólk má fara út til að fara í matvörubúðir, apótek, sinna nauðsynlegumstörfum og einnig mælti hann með því að fólk færi út í göngutúr eða fjallgöngur. Á mánudaginn tilkynnti ríkisstjórinn að allar strendur og garðar á vegum ríkisins yrðu lokaðir til að minnka útbreiðslu kórónuveirunnar, það var gert eftir að stórir hópar hópuðu sig saman þar um helgina. Það vildi þannig til að það rigndi mikið í síðustu viku, sem gerist nú ekki oft. En á laugardaginn var aftur frábært veður og þá fóru margir á ströndina og í fjallgöngur.“
https://www.instagram.com/p/B7l-DUzFkCz/
Verður að vera hægt að hafa gaman
Magnús segir að það sé mikið um að fólk sé að hamstra vörur í verslunum.
„Allur klósettpappír, handþurrkur og sótthreinsir er uppselt en mér heyrist það vera svipuð staða á Íslandi. Ég átti nokkra kassa af klósettpappír áður en þetta byrjaði þannig ég þarf ekki að hafa áhyggjur af því. Í verslunum hér í kring var helst dósamatur, pasta, frosinn matur, sósur, mjólk og brauð uppselt,“ segir hann.
„Ég er heppinn að vera með allt til alls þar sem ég á heima en það er sárt að vita til þess að hér eru margt fólk með lítið á milli handanna sem munu líklegast lenda í vandræðum, ég vona að það verði eitthvað hægt að hjálpa þeim sem minna mega sín. Ég reyni líka að versla við smærri fyrirtæki hérna í hverfinu frekar en stærri keðjur, en ég hef fengið sent kaffi og mat frá stöðum sem ég versla oft við heim til mín í staðinn fyrir að fara á staðinn eins og venjulega. Mér heyrist annað fólk vera duglegt að gera það líka sem er gott mál.“
Magnús segir að það sé þó hægt að hafa gaman í þessum aðstæðum.
„Á sama tíma og ástandið er alvarlegt þá verður að vera hægt að hafa smá gaman og reyna að lyfta sér aðeins upp. Það var ekki beinlínis ætlunin að búa til lag og myndband um það að vera í einangrun, en eitt leiddi að öðru og áður en ég vissi af var orðið til Kórónulag,“ segir hann.
Þú getur líka hlustað á lagið á Spotify og fylgst með Magnúsi á Instagram.