Tuttugu og átta ára karlmaður, Cameron James Pettit, hefur verið handtekinn og ákærður fyrir að útvega tónlistarmanninum Mac Miller ópíóðalyf sem talin eru hafa átt þátt í dauða hans.
Mac Miller, sem var þekktur tónlistarmaður og fyrrverandi kærasti Ariönu Grande, lést þann 7. september 2018. Miller var 26 ára en krufning leiddi í ljós að banamein hans var of stór skammtur af fíkniefnum. Í ákærunni kemur fram að Cameron hafi selt honum lyfin tveimur dögum áður en Miller fannst látinn.
Rannsókn hefur leitt í ljós að Miller bað Cameron um að útvega sér oxycodone og önnur fíkniefni. Í stað þess að útvega oxycodone, sem framleitt er af viðurkenndum lyfjaframleiðanda, er Cameron sagður hafa útvegað fölsuð lyf sem innihéldu fentanyl. Krufning leiddi í ljós að Miller hafði neytt fentanýls, kókaíns og áfengis áður en hann lést.
Í fréttum bandarískra fjölmiðla kemur fram að Cameron hafi aðeins verið ákærður fyrir að útvega lyfin, en hann hefur ekki verið ákærður fyrir að eiga þátt í dauða tónlistarmannsins. Meðal rannsóknargagna málsins eru Instagram-skilaboð sem Cameron sendi vini sínum þegar fregnir af dauða Miller spurðust út. Í skilaboðunum sagði hann vini sínum að hann myndi líklega deyja í fangelsi. Þá sagðist hann ætla að reyna að láta sig hverfa og flytja úr landi.
