Breska leikkonan Lashana Lynch mun taka við einkennisnúmerinu 007 í nýjustu kvikmyndinni um James Bond, en númerið hefur í áratugaraðir verið kennt við ofurnjósnarann. Fréttaveitan Guardian greindi fyrst frá fréttunum sem leggjast misvel í fólk.
Aftur á móti hefur myndast töluverður misskilningur á meðal aðdáenda, sem margir hverjir halda því fram að til standi framvegis að halda áfram með seríuna þar sem heimsfrægi njósnari hennar hátignar er ekki lengur karlmaður, að þetta sé gert til að auka vinsældir og umtal myndabálksins sem hefur verið rúllandi í meira en hálfa öld.
Undanfarin misseri hafa komið upp umræður um að James Bond verði mögulega að kvenpersónu síðar meir, en það hefur þó einungis verið orðrómur og framleiðendur sjálfir blásið á kjaftasögurnar. Hermt er að James Bond/Daniel Craig sé sestur í helgan stein í upphafi nýju myndarinnar og sé þá kominn arftaki, en arftakinn ber heitið Nomi og fer Lynch með það hlutverk. Þetta breytir því vissulega ekki að harðir Bond-aðdáendur voru fljótir að stökkva á lyklaborðin og tjá reiði sína.
Sjá einnig: Blökkukona í fótspor Bond
Á meðal margra vefsvæða er íslenski Facebook-hópurinn Kvikmyndaáhugamenn og spara sumir ekki stóru orðin þar.
Þetta er brot af þeim ummælum sem stóðu upp úr:
„Djöfulsins fokking kjaftæði. Er ekki í lagi með fokking fólk???“
„Þannig að stelpur vilja bara sjá kvenkynsútgáfur af öllum þekktum karlkynskarakterum. Really? Metnaðarleysi.“
„Hvaða helvítis grín er þetta, bara búið að eyðileggja james bond!“
„Þarf að hræra í öllu? Verður næsta BadBoys mynd leikinn af Söndru Bullock og Camaron Diaz??“
„Á ekki þá bara að láta konu leika Sherlock Holmes?“
„Þá fer Bond til helvítis, hef ekkert á móti hvorki svörtu fólki né konum, en Bond var skrifaður sem Hvítur Breskur karl á miðjum aldri“
„Er Dagur B. Eggerts að leikstýra myndinni?“
„Framleiðendur munu sjá eftir þessu það er ég nokkuð viss um. Svona kvenkyns remake floppa alltaf“
Sumir lásu þó fréttina almennilega og vita hver staðan er.
„Guð minn góður, ætla allir að ganga af göflunum án þess að lesa greinina?“
„Þetta er virkilega athyglisverð stefna. Framleiðendur vita að þeir fá heilmikla umfjöllun út á þetta því ákveðinn hópur fólk gjörsamlega missir sig á netinu yfir þessu. Minnir svolítið á það þegar kristnir fordæmdu hinar og þessar myndir, sem hafði alls ekki slæm áhrif á aðsóknina.“
„Hún er ekki að leika James Bond. Hún er að leika 007“