Sigurður Magnús Sigurðsson er einn af fjölmörgum aðdáendum sjónvarpsþáttanna Game of Thrones, en áttunda og síðasta þáttaröð er nú í sýningu. „Ég er mikill GOT-aðdáandi og er að endurlesa bækurnar núna. Var að klára að lesa aftur þriðju bókina og á þar með eftir tvær bækur af fimm,“ segir Sigurður, sem er 34 ára, búsettur í Philadelphiu í Bandaríkjunum, þar sem hann starfar við umsýslu fasteigna. „Ég rek fasteignir fyrir önnur fyrirtæki og er nýbúinn að fá nýja stöðu, þar sem ég vinn á Manhattan í New York.“

Í tilefni af síðustu þáttaröð GOT ákvað Sigurður að bregða á leik og útbjó dánarborð með persónum síðustu þáttaraðarinnar. Sigurður klippti út mynd af hverri persónu og þegar viðkomandi deyr kveikir hann á kerti fyrir viðkomandi. „Við eigum von á miklum dauðsföllum. GOT á það til að láta persónur í sögunni deyja, oft á mjög hryllilegan hátt.“

En er líf eftir GOT? „Hugsanlega. Ég er að bíða eftir næstu tveim bókum, en George R.R. Martin er að klára að skrifa síðustu tvær bækurnar, en þær eiga að verða sjö samtals,“ segir Sigurður. „Þannig að þetta er ekki búið. Það er líka mikilvægt að benda á að bækurnar eru mjög ólíkar þáttunum og það eru mun fleiri persónur í bókunum. Það er líka talað um að HBO-sjónvarpsstöðin ætli að gera „spin-off“-þáttaröð, sem mun gerast í GOT-heiminum, en í annarri tímalínu.“

Það er því ljóst að Sigurður og fleiri aðdáendur þáttanna þurfa ekki að örvænta alveg strax, við hin sem enn höfum ekki tekið ástfóstri við GOT eigum margt í vændum.