Varúð: Í lok þessarar greinar kemur fram hvernig þriðji þáttur í nýjustu seríu af Game of Thrones endaði. Þeir sem ekki hafa séð þáttinn eru því vinsamlegast beðnir um að loka fréttinni og lesa eitthvað allt annað. Nú, eða lesa áfram á eigin ábyrgð. Þitt er valið.
*
Aðdáendur Game of Thrones eru eflaust margir hverjir enn þá að jafna sig eftir þriðja þáttinn sem sýndur var aðfaranótt mánudags, en í henni urðu sjónvarpsáhorfendur vitni að baráttunni um Winterfell og lék fyrirlitlegi og vægðarlausi Næturkóngurinn veigamikið hlutverk, eins og búist var við.
View this post on Instagram
Næturkóngurinn er leikinn af hinum slóvenska Vladimir Furdik, sem hóf ferilinn sem áhættuleikari. Margir kannast eflaust við Vladimir úr Bond-myndinni Skyfall og ofurhetjumyndinni Thor: The Dark World, en Slóvakinn er 48 ára gamall og nær að fylla upp í tilkomumikið gervi Næturkóngsins.
Það er einnig gaman að fylgjast með Vladimir á Instagram þar sem hann er duglegur að birta myndir af tökustað Game of Thrones. Næturkóngurinn var upprunalega leikinn af velska leikaranum Richard Brake í seríum fjögur og fimm, en síðan þá hefur hlutverkið verið í höndum Vladimir. Gaman er að segja frá því að aðdáendur Game of Thrones sáu Vladimir fyrst í fimmta þætti í sjöttu þáttaröð þar sem hann lék mann sem var valin af skógarbörnunum til að vera vopn þeirra gegn mannkyninu. Í þættinum var hann bundinn við tré og stunginn af Leaf, foringja skógarbarnanna. Þar með breyttist hann í fyrsta White Walker-inn.
Eins og sést á Instagram er Vladimir hvers manns hugljúfi og elskar að gantast með meðleikurum sínum á setti – talsvert frábrugðinn karakternum í Game of Thrones.
Vladimir sló fyrst í gegn í Hollywood í myndinni The Three Musketeers árið 1993 þar sem hann lék á móti Charlie Sheen og Kiefer Sutherland. Þá var Vladimir áhættuleikari fyrir Nicholas Cage í kvikmyndinni The Season of the Witch árið 2011 og sama ár lék hann í Sherlock Holmes: A Game of Shadows.
View this post on Instagram
Og nú verður að vara þá aðdáendur sem ekki hafa horft á þriðja þáttinn í nýjustu seríu af Game of Thrones við, þar sem óhjákvæmilegt er að kjafta frá örlögum Næturkóngsins.
Næturkóngurinn beið bana í þættinum og var það hin knáa Arya Stark sem kom eins og þruma úr heiðskýru lofti, stakk kónginn með valyríu-stáli og drap hann, og alla White Walkers, með drekagleri.
View this post on Instagram
Samkvæmt iMDB er ekkert á döfinni hjá Vladimir nú þegar að tökum er lokið á Game of Thrones, en spennandi verður að sjá hvað hann tekur sér næst fyrir hendur.
