Fermingar eru framundan, en þær fyrstu voru 24. mars. Samkvæmt tölum Hagstofunnar eru einstaklingar sem verða 14 ára í ár um 4.300 talsins og því ljóst að mikill fjöldi mun fermast, þó að alltaf séu einhverjir sem kjósi að sleppa því.
Þau okkar sem hafa fermst eiga minningar um fermingardaginn; góðar, slæmar, vandræðalegar, fyndnar og allt þar á milli.
DV fékk nokkra þekkta einstaklinga til að rifja upp fermingardaginn og deila með lesendum mynd og minningu frá þessum merkisdegi.
Margrét Erla Maack danskennari og veislustjóri, 26. apríl 1998, Dómkirkjan
„Ég var mikill lúði í kringum ferminguna mína og vildi ekki fylgja tískustraumum og er gríðarlega þakklát fyrir það í dag. Ég fermdist í klassískum brúðarkjól móður minnar og hannaði fermingargreiðsluna með hárgreiðslukonunni upp úr nokkrum myndum úr tískublöðum, en ekki í kínakjól og kuldaskóm eins og margar vinkonur og mamma setti á mig eyeliner í fyrsta sinn. Veislan var geggjuð og stóð yfir næstum að miðnætti, stútfull af skemmtiatriðum og ræðum, dansatriði og frábærum heimatilbúnum mat úr ástareldhúsi foreldra minna.“
Listamaðurinn Odee, Oddur Eysteinn Friðriksson, 6. apríl 1997
„Það var eftirminnilegur dagur því amma mín fótbrotnaði í kirkjunni og sjúkrabíll þurfti að sækja hana í miðri athöfn. Hún sagði að það hefðu verið djöflar í kirkjunni. Í veislunni heima var ég í dökkblárri skyrtu og með fyrsta bindið mitt. Bindið hafði ég valið sjálfur en það var rautt með teikningum af sólum með sólgleraugum.“
Ingólfur Ragnarsson Geirdal, tónlistar- og töframaður, 25. apríl 1982
„Ég fermdist vorið 1982 og fékk frá foreldrum mínum utanlandsferð til frænku minnar sem þá bjó í Seattle, heimabæ Jimi Hendrix. Fyrir fermingarpeningana keypti ég minn fyrsta rafmagnsgítar og bassa handa Silla bróður ásamt vinylplötum með Alice Cooper, AC/DC, Deep Purple, Jimi Hendrix og fleirum. Hljóðfærin voru ódýrar eftirlíkingar en dugðu okkur til að læra eftir plötunum og má segja að þarna hafi verið lagður grunnurinn að tónlistarsamstarfi okkar bræðra, sem hefur varað æ síðan.“
Þráinn Freyr Vigfússon kokkur og eigandi ÓX og Sumac Grill + Drinks, 9. mars 1995
„Man bara eftir glæsilegu hlaðborði í veislunni. Já og ég spurði séra Hjálmar Jóns hvaða vikudag pálmasunnudagur væri eiginlega.“
Atli Steinn Guðmundsson lagerkall, prófarkalesari og fréttaritari, 27. mars 1988
„Það var fallegur sunnudagur, 27. mars 1988, þegar séra Bragi Friðriksson heitinn sletti á mig skinninu, eins og það var kallað til forna þegar illa uppfrætt barn var fermt. Þetta var í Garðakirkju og lítið rætt um það á þessum tíma hvort nafnalistar fermingarbarna í fjölmiðlum teldust birting viðkvæmra persónuupplýsinga um trúarskoðanir. Ég valdi mér ritningargrein úr sálmum Davíðs í von um að komast að því hvar hann hefði keypt ölið þrátt fyrir bjórbann sem enn gilti á Íslandi þetta vor. Síðar tók ég ásatrú en hef nú snúist til búddisma.“
Bjarni Hafþór Helgason, tónskáld og fyrrum fjölmiðlamaður, 2. maí 1971, Húsavíkurkirkja
„Ég vildi ekki láta taka af mér sérstaka fermingarmynd, þannig að hún er ekki til. Ég fékk góðar hefðbundnar fermingargjafir en þó vakti nokkra athygli gjöfin frá foreldrunum en það var 22 calibera riffill. Ég var 14 ára og þurfti að bíða í tvö ár með að fá að skjóta úr honum en á þessum tíma fékk maður byssuleyfi 16 ára. Ég hafði mikið talað um að það væri stóri draumurinn minn að eignast riffil, pabbi og mamma ákváðu að láta það eftir mér og gerðu mig alveg himinsælan. Það var tekin af mér ein ljósmynd með riffilinn á fermingardeginum. Ég held að skotvopn séu ekki algeng í gjafapökkum fermingarbarna, hvorki fyrr né síðar.“
Bjarni Hafþór ásamt fermingarsystkinum sínum.
