Salvatore Torrini, faðir söngkonunnar Emilíönu Torrini, er látinn. Hann lést á heimili sínu síðastliðinn mánudag samkvæmt andlátstilkynningu í Morgunblaðinu í dag.
Veitingahúsafjölskylda
Salvatore var frá Napólí í Ítalíu, fæddur 9. júní árið 1946. „Ég kom hingað til lands út af konu eins og svo margir útlendingar,“ sagði Salvatore í viðtali við Fréttablaðið árið 2002. Hann kom til landsins fyrir tæplega 50 árum.
Salvatore rak vinsæla veitingastaðinn Ítalíu í Reykjavík.
Emilíana lýsti föðurfjölskyldu sinni sem „veitingahúsafjölskyldu“ í viðtali við Morgunblaðið árið 1996.
„Þetta er veitingahúsafjölskylda, ekta ítölsk fjölskylda frá Napólí. Afi var með veitingahús. Tveir bræður pabba áttu veitingastaði í Þýskalandi og mamma og pabbi fóru þangað til að prófa það þegar ég var 10 ára. Við vorum því í tvö ár í ítalskri fjölskyldu í Frankfurt,“ sagði hún.
Fóru til Ítalíu til að skíra hana
Emilíana sagði frá því í viðtali við Vísi árið 2013 að faðir hennar hafi þurft að breyta nafninu sínu þegar hann flutti til Íslands, en á þeim tíma þurftu allir íslenskir ríkisborgarar að heita íslenskum nöfnum.
„Hann er ítalskur og nafninu hans var breytt úr Salvadori Torrini í Davíð Eiríksson. Mamma og pabbi fóru svo til Ítalíu að gefa mér mitt nafn. Þau vildu að ég héti Emilíana í höfuðið á báðum ömmunum mínum, sú íslenska heitir Emilía og sú ítalska Anna. Það var eitthvert vesen með að fá það nafn í gegn hér. Torrini var svo skráð millinafn hjá mér og ég varð Davíðsdóttir. Það var mjög ruglandi fyrir mig þegar ég fékk minn fyrsta passa – Davíðsdóttir,“ sagði Emilíana.