Ok missti sinn sess sem jökull árið 2014 en þá hafði hann bráðnað nánast að fullu og taldist því ekki lengur vera einn af jöklum Íslands. Í ágúst á þessu ári var haldin minningarathöfn fyrir jökulinn og var þá afhjúpaður minnisvarði. Á minnisvarðanum er texti eftir Andra Snæ en hann má lesa hér fyrir neðan
„Ok er fyrsti nafnkunni jökullinn til að missa titil sinn. Á næstu 200 árum er talið að allir jöklar landsins fari sömu leið. Þetta minnismerki er til vitnis um að við vitum hvað er að gerast og hvað þarf að gera. Aðeins þú veist hvort við gerðum eitthvað.“
Neðst á minnisvarðanum er svo að finna magn koltvíoxíðs í andrúmsloftinu núna, 415 milljónarhlutar (ppm), en magnið hefur ekki verið meira á jörðinni í yfir þrjár milljónir ára.
BBC birti í dag myndband þar sem þáttastjórnandinn Cat Moh gengur með Andra að minnisvarðanum og þau spjalla saman um örlög jökulsins.
Andri Snær hefur lengi verið þekktur fyrir baráttu sína fyrir hönd náttúrunnar en nýútkomin bók hans, Um tímann og vatnið, fjallar um breytingar sem munu snerta allt líf á jörðinni.
„Á næstu hundrað árum verða grundvallarbreytingar á eðli vatns á jörðinni. Jöklar munu bráðna, yfirborð hafsins rísa og sýrustig þess breytast meira en sést hefur í 50 milljón ár. Breytingarnar snerta allt líf á jörðinni, alla sem við þekkjum og alla sem við elskum. Þær eru flóknari en flest það sem hugurinn er vanur að fást við, stærri en öll fyrri reynsla okkar, stærri en tungumálið.“
