Sólborg Guðbrandsdóttir, stofnandi og umsjónamaður Fávitar á Instagram, opnaði umræðu um fullnægingar í gær. Fávitar er Instagram síða og „átak gegn stafrænu og annars konar kynferðisofbeldi.“

Sólborg spurði fylgjendur sína, sem eru rúmlega 19 þúsund talsins, hvort þeir hafi gert sér upp fullnægingu og ef svo er, af hverju.

Svörunum rigndi inn og voru margir sem viðurkenndu að hafa gert sér upp fullnægingu. Ástæðurnar voru fjölbreyttar og margar sláandi. Margir sögðust hafa gert sér upp fullnægingu til að þóknast maka sínum, sumir sögðust hafa gert það til að enda kynlífið eða koma sér úr aðstæðum sem þeim leið ekki vel í.

„Why the fuck gera stelpur þetta svona oft? Hættið að please-a gaura sem geta ekki látið ykkur fá það. Hverjum eruð þið raunverulega að gera greiða með því að feika? Hvorki sjálfum ykkur né þeim,“ skrifaði Sólborg í Instagram Story í gær. Sólborg hefur vistað allt Instagram Story um málefnið í „highlights“ undir Fullnægingar.

„Ef ykkur langar að hætta, þá eigið þið að hætta. Fullnæging er ekkert eina leyfið ykkar til þess. Þið megið stoppa leikinn hvenær sem er.“

Sólborg svaraði mörgum sem skrifuðu til hennar. „Bíómyndir LJÚGA! Þið eruð EKKI misheppnaðar ef það tekur tíma fyrir ykkur að fá það! Það er ógeðslega basic.“

Samskipti eru mikilvæg í kynlífi segir Sólborg og ítrekar það oft í umræðunni í Instagram Story.

Sólborg segir að sjálfsfróun sé lykillinn. „Þegar við kunnum betur á okkur sjálfar getum við notið þess meir ef við stundum kynlíf með öðrum því við þekkjum okkur sjálfar vel.“

Margir, bæði stelpur og strákar, sögðust hafa gert sér upp fullnægingu svo makanum liði ekki illa.

„Veit ekki með ykkur en mér liði verr ef ég kæmist að því að manneskjan hefði feikað frekar en að leiðbeina mér bara. Held ég að flestir vilji raunverulega gera eitthvað sem hinni manneskjunni finnst gott og vilja gera vel – það er engin skömm í því að leiðbeina. Samskipti og þolinmæði= „WINWIN“ allir græða.“

Fjöldi stráka sendu einnig skilaboð á Sólborgu. „Miklu fleiri feik fullnægingar frá strákum en mig grunaði. Vellíðan okkar allra skiptir máli og það er mikilvægt að við stöndum með sjálfum okkur og segjum hvað okkur finnst gott og hvað ekki. Við þurfum ekki að fíla það sama og aðrir, það er í lagi.“

Sólborg spyr hvort að kynlíf þurfi alltaf að enda með fullnægingu, sama hvað.

„Það má stoppa. Fullnæging er ekki eini mögulegi endapunkturinn í kynlífi.“

Einn fylgjandi bendir Sólborgu á að ef aðili gerir sér upp fullnægingu lærir makinn vitlaust á þarfir hans. „Ef einn aðili feikar fullnægingu, „lærir“ hinn aðilinn vitlaust á manneskjuna og heldur þess vegna kannski að þetta sé það sem hún/hann/hán fílar. Virkar eins og vítahringur því það verður erfiðara með tímanum að viðurkenna að hafa feikað þetta. Kynlíf er til að njóta og það er ekki hægt nema samskiptin séu í topp málum,“ segir fylgjandinn og Sólborg tekur undir.

Horfðu á alla umræðuna á Instagram undir Fullnægingar á Instagram-síðu Fávitar.