Vegna fréttar sem birtist á DV fyrr í kvöld um lokun skemmtistaðarins Austur í Austurstræti, þar sem rætt var við Kamran Keivanlou, son annars eiganda staðarins, vill Víkingur Heiðar Arnórsson, framkvæmdastjóri Austur, sem vikið var úr starfi fyrr í vikunni koma eftirfarandi á framfæri:

Yfirlýsing frá Víkingi Heiðari Arnórssyni fyrrum framkvæmdastjóra Austur.

Vegna fréttar sem birtist á DV.is í dag, laugardaginn 22. september, vil ég leiðrétta rangfærslur sem viðmælandi DV lætur þar hafa eftir sér.

Atburðir liðinnar viku hafa ekkert með eigendaskipan eða Kamran Keivanlou að gera.

Falskar ásakanir á hendur mér, svikin loforð og mistúlkun á upplýsingum til eiganda staðarins sem talar hvorki íslensku né ensku, gerði það að verkum að mér var vikið úr starfi sem framkvæmdastjóra Austurs fyrr í vikunni. Starfsfólk staðarins fékk ósannar upplýsingar um málsatvik, bæði að ég hafi farið í góðu og einnig hverjar ástæður uppsagnarinnar voru og ætluðu því einhverjir starfsmenn að halda áfram störfum sínum og opna staðinn fyrir helgina. Til að því sé haldið til haga, var staðurinn opinn til rúmlega 22 í gær.

Þegar starfsfólk fékk að heyra sannleikann í málinu, þá var það sameiginleg ákvörðun allra starfsmanna Austur að standa saman og enginn starfsmaður vill vinna fyrir eigendur staðarins fyrr en búið er að gera hreint í málum staðarins og loforð eigenda hafa verið efnd.

Ég tók niður rekstrarleyfi staðarins,  þar sem ég er einn ábyrgðarmaður fyrir því. Þegar ég er búinn að missa trúverðugleika á eigendum og stjórnendum, get ég ekki treyst að reksturinn fari fram með viðeigandi hætti og neyddist ég því til að taka það niður.

Austur verður ekki opnaður aftur fyrr en ég og eigandi staðarins höfum sest niður á fundi og samið um áframhaldandi rekstur Austur, þar sem ég mun hafa hagsmuni starfsfólksins í fyrirrúmi.

Ég mun ekki svara frekari fyrirspurnum fyrr en að þeim fundi loknum.

Virðingarfyllst, Víkingur Heiðar Arnórsson