Björg Magnúsdóttir, oddviti Viðreisnar í Reykjavík, segir það lykilatriði að tryggja að Reykjavík verði borg sem fólk velur að búa í til framtíðar. „Til þess að næsta kynslóð velji að vera hérna þarf Reykjavík að virka. Biðlistaborgin er ekkert sérstaklega sjarmerandi. Reykjavík á að vera frjálslyndari, skemmtilegri, einfaldari og fallegri. Hér á að vera gaman að stofna og reka fyrirtæki. Hverfin eiga að vera sterk og sjálfstæð – og innihalda alla lykilþjónustu fyrir fólk og fjölskyldur,“ sagði Björg.
Viðreisn leggur áherslu á að auka framboð af hagkvæmu húsnæði og einfalda regluverk í kringum uppbyggingu. Með því að hraða leyfisveitingum og auka sveigjanleika í skipulagi vill flokkurinn stuðla að því að fleiri íbúðir rísi hratt og að húsnæðismarkaðurinn virki betur fyrir ólíka hópa.
Áhersla er lögð á að skattfé borgarbúa skili sér hraðar og beint út í hverfin. Borgin fær um 200 milljarða á ári í tekjur. Viðreisn vill taka milljarð úr stjórnsýslunni og færa þessa fjármuni beint í grunnþjónustuna, inn í skóla, íþróttir, velferð og umhirðu borgarinnar. Þá vill Viðreisn einfalda stjórnsýslu borgarinnar, stytta boðleiðir og byggja upp aukið traust til fagfólks, fyrirtækja og íbúa.
„Borgin á að vera til staðar þegar við þurfum á henni að halda, auðvelda líf okkar en ekki þvælast fyrir að óþörfu og leggja steina í götu fólks og atvinnulífs. Borgin á að vera þjónustustofnun – ekki eftirlitsstofnun. Þessu ætlum við að snúa við,“ sagði Björg.
Reykjavík á að vera í forystu í skólamálum. Mikilvægt er að bæta starfsskilyrði í skólum borgarinnar, m.a. með því að taka á húsnæðis- og mygluvanda og manneklu. Viðreisn styður fjölbreytt rekstrarform í leikskólum og dagvistun og vill standa vörð um stórar kvennastéttir, enda flokkur jafnréttis. Þá vill Viðreisn tryggja fjölbreyttar og skilvirkar samgöngur með stuðningi við Samgöngusáttmála, Borgarlínu og lausnir sem auka á frelsi í samgöngumáta. „Sterkar almenningssamgöngur eru bæði umhverfismál og jafnréttismál en ekki síst kjaramál fyrir fjölskyldur. Ef strætókerfið virkar, við höfum deilibíla og fjölbreyttar lausnir geta fjölskyldur losað sig við bíl númer tvö og þrjú í rekstri. Og það telur,“ sagði Björg.
Róbert Ragnarsson, sem er í öðru sæti á listanum boðar aðgerðir til að skýra ábyrgð á rekstri og viðhaldi eigna og tryggja að fjármunir nýtist betur í þágu íbúa.
„Við ætlum að lista upp öll verkefni borgarinnar, í samstarfi við stjórnendur, og leggja áherslu á grunnþjónustu og kjarnaverkefni. Í þessu felst auðvitað að stöðugildum í stjórnsýslu mun fækka. Ég hef gert það áður með góðum árangri, og treysti mér til að gera það aftur,“ sagði Róbert.
„Reykjavíkurborg er höfuðborg allra landsmanna og við viljum vera til staðar fyrir alla landsmenn. Skapa tækifæri, skapa atvinnu, og vera vettvangur menningarlífs. Það þýðir ekki að við eigum að leysa verkefni og þjónustu fyrir önnur sveitarfélög án eðlilegra greiðslna. Það er komið gott af því að skattgreiðendur í Reykjavík niðurgreiði velferðarþjónustu fyrir önnur sveitarfélög,“ sagði Róbert.
Viðreisn ætlar að selja fyrirtæki og fasteignir sem tengjast ekki kjarnastarfsemi borgarinnar og nýta þá peninga til að borga niður skuldir. Perlan er gott dæmi um fasteign sem borgin þarf ekki að eiga, og hún var nýlega seld með góðum árangri. Viðreisn vill halda áfram á þeirri braut.
Viðreisn býður fram samhentan hóp fólks sem ætlar að þjónusta borgarbúa og tryggja vinnufrið í ráðhúsinu.
„Egóin okkar munu ekki þvælast fyrir þannig að við séum í sífellu að skipta um forystu í nefndum og ráðum – skipta um nýjan formann borgarráðs eða borgarstjóra. Við erum ekki að leita okkur að þægilegri innivinnu heldur bjóðum okkur fram til þess að mæta peppuð í vinnuna á hverjum degi fyrir borgarbúa. Við bjóðum okkur fram til að búa til skemmtilegri og betri borg sem Reykvíkingar eru stoltir af og velja að búa í,“ sagði Björg að lokum.
