ÍBV hefur verið í miklum vandræðum í Bestu deild karla það sem af er. Mæting stuðningsmanna á völlinn hefur þá verið dræm.

Eyjamenn eru aðeins með eitt stig og markatöluna 5:14 eftir fjóra leiki. Liðið var til umræðu í þættinum Mín Skoðun með Valtý Birni. Þar var komið inn á mætinguna.

„Það hjálpar ekki til að mætingin á leikina er gjörsamlega fyrir neðan allar hellur. Það er allt að því pínlegt að horfa upp á þetta,“ sagði Kristinn Kjærnested í þættinum.

„Maður er bara svekktur með að fólkið í Eyjum skuli ekki reyna að mæta á völlinn og styðja sína menn. Það er nánast hægt að telja áhorfendurna þarna á fingrum annarrar handar.“

Valtýr tók undir þessi orð. „Ég er sammála því. Ég hef tekið eftir þessu. Þetta er ekki það sem maður þekkir úr Eyjum.“

Eyjamenn mæta Breiðabliki í næsta leik á sunnudag og verður fróðlegt að sjá hvort liðið og stuðningsmenn bæti sitt ráð.