Orðið á götunni er að upp sé komin sú vandræðalega staða að skoðanakannanafyrirtækið Gallup reynist vera með nána tengingu við einn frambjóðanda í forsetakjörinu, Katrínu Jakobsdóttur. Staðfest er að samskiptafyrirtækið Aton JL sjái um hönnun og útlit fyrir framboð Katrínar en eignatengsl eru milli þess og Gallups. Það getur ekki annað en valdið tortryggni þegar skoðanakannanir verða birtar í aðdraganda kosninganna.

Í síðasta tölublaði Heimildarinnar segir um þetta orðrétt: „… Aton JL sér um hönnun og útlit fyrir framboð Katrínar. Huginn Freyr Þorsteinsson er tengill fyrirtækisins við framboðið. Hann er einn eigenda Aton JL og á síðasta ári varð hann stjórnarformaður GALLUP eftir að félag sem er að hluta í eigu Hugins, Hamarshylur, keypti Gallup. Hann hefur lengi verið innanbúðarmaður hjá Vinstri grænum og var til að mynda aðstoðarmaður Steingríms J. Sigfússonar þegar hann var ráðherra …“

Þessi augljósu og miklu tengsl framboðs Katrínar Jakobsdóttur við skoðanakannanafyrirtækið Gallup hljóta að valda mikilli tortryggni og gera fyrirtækið ótrúverðugt í aðdraganda forsetakosninganna.

Orðið á götunni er að eðlilegt sé að meta fyrirtækið vanhæft að þessu sinni.