Great Place to Work (GPTW) hefur birt fyrsta „Frábærir Vinnustaðir fyrir Konur“ listann á Íslandi. GPTW er alþjóðleg stofnun um vinnustaðamenningu og hefur gefið út topplista yfir bestu fyrirtæki landsins undanfarin fjögur ár. Nú tilnefnir stofnunin bestu vinnustaðina fyrir konur hér á landi. AÞ-Þrif eru í efsta sæti, Sahara í öðru sæti, Orkan í því þriðja. CCP Games er í fjórða sæti, DHL-Express í því fimmta og BYKO í sjötta sæti.

„Við erum mjög ánægð með að birta fyrsta Great Place to Work „Frábærir Vinnustaðir fyrir Konur“ listann á Íslandi.  Jafnrétti á vinnustað er mikilvægt viðfangsefni í viðskiptum og sérstaklega í mannauðsmálum. Á ráðstefnunni Mannauðsdagurinn 2023 var til dæmis fjallað ítarlega um fjölbreytileika og jöfnuð. Þessi fyrirtæki sem eru á listanum eru að ryðja brautina fyrir jafnrétti kynjanna á vinnustað. Þau hafa konur í forystuhlutverkum, berjast gegn mismunun og styðja við faglega þróun kvenkyns starfsmanna sinna.  Við erum stolt af því að viðurkenna þau sem leiðtoga í jafnréttismálum á vinnustað,“ segir Ingibjörg Ýr Kalatschan, viðskiptastjóri GPTW.

„Ísland er þjóð sem er í fremstu röð í baráttu um jafnrétti kynjanna að því leyti að það hefur gert launajafnrétti kynjanna að lögum. Það er samt alltaf hægt að gera betur, til dæmis að tryggja að konur af erlendum uppruna njóti einnig þessara fríðinda á sama stigi og konur fæddar á Íslandi. Fjölmargir af okkar viðskiptavinum hallast að því að hafa fjölbreyttan starfskraft og bjóða upp á sanngjarnt jafnaðar umhverfi fyrir starfsfólk sitt,“ segir Ingibjörg.

„Við hjá Great Place to Work vonum að fleiri fyrirtæki muni fylgja fordæmi þessara fyrirtækja og sækjast eftir jafnrétti kynjanna sem og heildarfjölbreytileika á vinnustaðnum með því að leita á virkan hátt eftir mótframlagi frá starfsfólki sínu og nýta gögnin til að skapa breytingar og framfarir á vinnumarkaði,“ segir hún.

Ingibjörg segir enn fremur að Íslendingar hafi gott orð á sér fyrir að leggja mikið á sig í því að vinna að jöfnuði karla og kvenna á vinnustöðum, sérstaklega þegar kemur að launajafnrétti. „Jafnrétti kynjanna er líka afar mikilvægt fyrir Great Place To Work og umtalsverður hluti af árlegri könnun okkar er tileinkaður jafnrétti kynjanna.“