Orðið á götunni er að valdabarátta að tjaldabaki hjá Miðflokknum í Suðurkjördæmi stigmagnist. Þar sækist Tómas Ellert Tómasson, vinsæll byggingarverkfræðingur, eftir oddvitasæti er sagður mæta harðri andstöðu frá fylgismönnum Karls Gauta Hjaltasonar, lögreglustjóra í Vestmannaeyjum og fyrrverandi þingmanni Miðflokksins.

Orðið á götunni er að slagurinn standi um það hvort flokkurinn muni fara aftur til fortíðar með Karli Gauta og hans fylgismönnum, eða hvort Tómas Ellert, sem þykir tákn nýrra tíma hjá Miðflokknum, nái að hreppa oddvitasætið.

Orðið á götunni er að þessi valdabarátta tengist átökum Tómasar Ellerts og Leós Árnasonar, eiganda fasteignafélagsins Sigtúns, sem á og rekur nýja miðbæinn á Selfossi. Tómas Ellert greindi frá því á sínum tíma að Leó hefði reynt að múta sér með fjárhagsaðstoð til kosningabaráttu Miðflokksins gegn því að flokkurinn félli frá því að bærinn gerði tilboð í gamla Landsbankahúsið á Selfossi. Leó neitaði þessum ásökunum og sagðist hafa stutt frambjóðendur úr öllum flokkum án þess að biðja um greiða í staðinn.

Orðið á götunni er að átök Tómasar Ellerts við Leó, sem er viðskiptafélagi Kristjáns Vilhelmssonar, eins eiganda Samherja, séu rót þess að nú sé reynt að halda honum frá oddvitasæti. Tómas Ellert hafi í gegnum tíðina verið óhræddur við að gagnrýna valdaklíkur. Hann hafi margsinnis látið í ljós að hann óttist engan og sé tilbúinn að standa fastur gegn hagsmunatengslum sem hann telji ekki eiga heima í stjórnmálum.

Orðið á götunni er að niðurstaðan úr þessum átökum geti ekki aðeins mótað framtíð Miðflokksins á Suðurlandi heldur einnig varpað ljósi á það hverjir séu samherjar hverra. Þessi mál gætu skýrst á hverrti stundu.