Breki Karlsson, formaður Neytendasamtakanna, og Ragnar Þór Ingólfsson, formaður VR, hvetja lánþega hjá íslenskum bönkunum til að vera vakandi fyrir því að kröfur, sem fólk gæti átt á bankanna vegna yfirvofandi málsóknar, firnist ekki. Þetta kemur fram í aðsendri grein vopnabræðranna á Vísi þar sem lánþegar eru hvattir til þess að skoða sín mál og tryggja sína hagsmuni.
Það vakti mikla athygli í maí síðastliðinum þegar EFTA-dómstóllinn gaf frá sér það álit að skilmálar lána íslensku bankanna með breytilegum vöxtum væru ekki nógu skýrir fyrir neytendur og ætla megi að þeir séu hreinlega ólöglegir.
Um það þurfa hérlendir dómstólar að úrskurða og Neytendasamtökin og VR hafa höfðað mál fyrir Héraðsdómum Reykjavíkur og Reykjaness sem verða tekin fyrir næsta haust. Um gríðarlega hagsmuni gæti verið að ræða því vinnist málin gæti hver og einn lánþegi átt inni háar fjárhæðir hjá bönkunum.
Breki og Ragnar hvetja hins vegar lánþega sem hafa greitt upp lán sín eða endurfjármagnað þau á síðustu árum til að skoða sín mál og tryggja að slíkar kröfur fyrnist ekki en það gerist á fjórum árum.
