Mikilvægt er að forseti hraði sér ekki um of þegar forsætisráðherra gengur á hans fund á miðju kjörtímabili og óskar eftir því að forseti rjúfi þing og boði til kosninga, sem gerist reglulega hér á landi. Baldur Þórhallsson segir mikilvægt að í þessum efnum sem öðrum sé ekki sjálfsafgreiðsla á Bessastöðum og að forseti gangi úr skugga um það hver vilji þingsins er áður en hann verður við beiðni forsætisráðherra undir slíkum kringumstæðum. Baldur er gestur Ólafs Arnarsonar í sjónvarpsþætti á Eyjunni í aðdraganda forsetakosninga. Þáttinn má nálgast hér á Eyjunni, á hringbraut.is og á Hringbrautarrás Sjónvarps Símans. Einnig má hlusta á hann sem hlaðvarp.

Hér er brot úr þættinum:

Eyjan - Baldur Thorhallsson - 4.mp4

„Það gerist reglulega, kannski annan hvern áratug eða svo, að forsætisráðherra gengur á fund forseta á miðju kjörtímabili og óskar eftir því að forseti rjúfi þing og boði til kosninga. Þá kemur spurningin, eins og þú nefndir áðan, á forseti að verða við beiðni forsætisráðherra?“ segir Baldur.

„Að mínu mati þarf forseti aðeins þarna að staldra við því hann þarf að skoða hver er vilji þingsins, aftur á grundvelli þingræðisreglunnar. Ef til vill vill þingið bara skipta um forsætisráðherra. Það er bara að losa sig við forsætisráðherrann og vill bara nýjan, kannski með sama þingmeirihluta. Eða það sé kominn nýr þingmeirihluti með nýrri ríkisstjórn og nýjum forsætisráðherra.“

Hér er þátturinn í heild:

HB_EYJ105_NET_BÞ.mp4

Baldur segir að forseti þurfi að ráðfæra sig við þingið áður en hann tekur ákvörðun um það hvort hann verði við beiðni forsætisráðherra. „Ef það er þannig að það sé ljóst að meirihluti þingsins vilji ganga til kosninga þá auðvitað verður forseti við beiðni forsætisráðherra, en það fer raunverulega eftir vilja þingsins. Þannig að aftur, þá má ekki vera sjálfsafgreiðsla á Bessastöðum. Það skiptir miklu máli að doka við og hraða sér ekki um of heldur skoða í grunninn hver er vilji þingsins.“