Harpa er í samkeppni við önnur tónlistar- og ráðstefnuhús í allri Evrópu og, auk gæða hússins, þá er staðsetningin, mitt á milli Evrópu og Bandaríkjanna, mikill styrkur. Án Hörpu hefðu viðburðir á borð við Arctic Circle og kvenleiðtogaráðstefnurnar sem Hanna Birna Kristjánsdóttir hefur staðið fyrir tæpast orðið að þeim miklu viðburðum sem raunin er. Svanhildur Konráðsdóttir, forstjóri Hörpu, er gestur Ólafs Arnarsonar í Markaðnum á Eyjunni.
Markadurinn - Svanhildur Konradsdottir - 3.mp4
„Þetta er dálítið að vera með hús sem er svona saman sett, er með þetta mikla listræna starfsemi, með Sinfóníuhljómsveit Íslands sem fastan íbúa, Íslensku óperuna fram á þennan dag og síðan geri ég ráð fyrir að Þjóðarópera taki við hér í húsinu. Hér eru um sjö hundruð listviðburðir á ári. Svo er líka þetta sterka og mikla viðburðahald sem er ráðstefnumegin og fundamegin. Þar erum við með markvissum hætti í samstarfi við Ráðstefnuborgina Reykjavík, eða Meet in Reykjavík, sem er markaðssamstarf innan vébanda Íslandsstofu. Þar erum við að sækja á alþjóðlega markaði, erum að kynna Reykjavík, auðvitað, og þá Hörpu sem álitlegan fundarstað,“ segir Svanhildur.
Hún segir Hörpu vera í samkeppni við hús í Norður-Evrópu og raunar allri Evrópu. „Við erum sterk þegar kemur að því að vera Mid-Atlantic, eða mitt á milli Evrópu og Bandaríkjanna, og fyrir alþjóðlega viðburði er Harpa sterk. Hér eru haldnar mjög stórar ráðstefnur, einmitt sumar þannig að það er ekki einn einasti íslenskur þátttakandi. Það geta verið læknasamtök eða fjármálafyrirtæki, eða bara nefndu það, það eru engin mörk á því hvernig það er.“
Svanhildur segir að ekki megi gleyma því að viðburður á borð við Arctic Circle hefði að öllum líkindum ekki þróast neitt í líkingu við það sem raunin hefur orðið, ekki orðið svona glæsilegur viðburður og áhrifamikill, ef ekki hefði verið fyrir hús eins og Hörpu. „Ég held að Ólafur Ragnar Grímsson, sem er auðvitað guðfaðir þessa viðburðar, hann segir þetta sjálfur. Vegna þess að Harpa var hér til þá er hægt að byggja hér viðburði eins og Arctic Circle, sem er auðvitað alveg af hæsta „level“ ef það má orða það þannig, og þar sem er verið að fjalla um feikilega mikilvæg og brýn málefni. Auðvitað viljum við að Harpa verði vettvangur fyrir svona merkingarbæra viðburði.“
Svanhildur segir þetta ekki síst eiga við um málefni sem tengjast norðurslóðum. Ekki megi heldur gleyma málefnum sem tengjast mannréttindamálum. „Annar viðburður, sem Hanna Birna Kristjánsdóttir hefur verið að byggja hér upp og hefur verið árviss með kvenleiðtogum víða að úr veröldinni. Þannig að það eru þessir viðburðir sem við erum mjög stolt af þó að húsið sé ekki að halda þetta sjálft. En við erum auðvitað vettvangurinn fyrir þetta og erum mjög stolt af því.“
