Mosfellsbær hefur farið fram á nauðungaruppboð á lóð úr landi Sólvalla í sveitarfélaginu sem er í eigu fyrirtækisins Sólvellir – heilsuklasi ehf. Fyrirtækið, sem er í eigu athafnamannsins Sturla Sighvatssonar, hafði metnaðarfullar hugmyndir um uppbyggingu einkarekins spítala og hótel á landinu en þær hafa runnið út í sandinn.
Upphafsmaður verkefnisins var Hollendingurinn Henri Middeldorp sem í júlí 2016 undirritaði leigusamning við Mosfellsbæ til 99 ára um landið fyrir hönd félagsins MCBP ehf. og var sá samningur með kauprétt að landinu að uppfylltum ákveðnum skilyrðum.
Middeldorp hugðist, ásamt innlendum og erlendum aðilum, fjárfesta í einkareknum spítala og hóteli fyrir rúma 50 milljarða króna. Átti spítalinn fyrst og fremst að þjónusta erlenda sjúklinga og vera með 150 herbergjum. Hótelið átti að vera 250 herbergja og var ráðgert að verkefnið myndi skapa um 1.000 ný störf.
Málið varð fljótt afar umdeilt og var mikið fjallað um það í fjölmiðlum. Meðal annars skrifaði Kári Stefánsson grein þar sem hann fullyrti að „útlendingaspítalinn“ myndi ganga af íslensku heilbrigðiskerfi dauðu. Segja má að tvær ástæður hafi verið fyrir því að fregnir af verkefninu féllu í grýttan jarðveg. Einkarekstur í heilbrigðiskerfinu er viðkvæmt mál hér á landi en ekki síður var Middeldorp dularfullur í meira lagi.
Fljótlega fóru að berast fregnir af því að hann hefði sett sig í samband við fjölda aðila hér á landi, kynnt fyrir þeim verkefni og sagst vera með fjársterka aðila á bak við sig. Engin slík áform höfðu þó raungerst og var hann meðal annars sakaður um að hafa blekkt hugsanlega meðfjárfesta í öðrum verkefnum.
Verkefnið í Mosfellbæ átti að vera fjármagnað með láni frá félaginu Burbanks Capital í Hollandi sem var sagt vera fjármagnað af fjársterkum aðilum. Hollendingurinn varðist þó allra fregna um hverjir þessir aðilar væru. Á heimasíðu fyrirtækisins var meðal annars fullyrt að það væri í samvinnu við kísilframleiðandann Silicor Materials.
Aðeins rúmum tveimur mánuðum eftir undirskrift lóðarleigusamningsins fór að hrikta í stoðum verkefnisins. Íslendingar í stjórn MCPB ehf, sem tengdust VHE-vélaverksmiðju Hjalta Einarssonar ehf. og áttu að eiga tveggja prósenta hlut, drógu sig úr verkefninu. Verkefnið fjaraði því fljótt út og ekkert hefur spurst til Middeldorp síðan.
Nokkru síðar virðist athafnamaðurinn Sturla Sighvatsson hafa eygt tækifæri í uppbyggingu á lóðinni. Hann eignaðist MCPB ehf. í gegnum tvö einkahlutfélög og breytti nafni fyrirtækisins í Sólvellir – Heilsuklasi ehf. Lítið hefur þó komið fram um byggingaráform á lóðinni enda hefur fasteignaveldi Sturlu hrunið á undanförnum árum.
Sjá einnig: Fasteignaveldi Sturlu að hruni komið: Enn fleiri eignir á nauðungarsölu.
Í lok árs 2019 fjallaði Fréttablaðið um að Mosfellsbær hefði falið bæjarlögmanni sínum að fella niður 99 ára leigusamninginn við Sólvelli – Heilsuklasa ehf. á grundvelli þess að engar framkvæmdir voru hafnar á landinu. Ákvæði í leigusamningum sagði að framkvæmdir þyrftu að hefjast innan tveggja ára en þrjú og hálft ár var liðið frá undirrituninni þegar bærinn greip til aðgerða.
Bænum varð ekki ágengt að fá leigusamninginn felldan niður og hefur því nú kosið að fara fram á nauðungarsölu landsins. Að óbreyttu fer uppboðið fram þann 1. mars næstkomandi.
