Jana Salóme Ingibjargar Jósepsdóttir, varabæjarfulltrúi á Akureyri, gefur kost á sér til að leiða lista VG á Akureyri fyrir sveitarstjórnarkosningarnar þann 14. maí næstkomandi.

Jana er menntaður efnafræðingur, með gráðu í mannauðsstjórnun og hefur starfað sem hótelstjóri á sumrin, en vinnur nú á veitingastaðnum Berlín. Jana situr í Umhverfis- og mannvirkjaráði Akureyrarbæjar og í stjórn Hafnarsamlags Norðurlands. Auk þess situr hún í stjórn VG á Akureyri, er formaður stjórnar kjördæmisráðs VG í Norðausturkjördæmi og varaformaður Ungra vinstri grænna.

Í fréttatilkynningu frá Jönu Salóme segir hún að Akureyrarbær hafi allt sem til þarf til að vera leiðandi í umhverfismálum. Nauðsynlegt sé að taka afgerandi afstöðu í loftslagsmálum, bæta aðstöðu fyrir aðra samgöngumáta en einkabílinn, fara í innleiðingu á nýju leiðarkerfi strætó og flýta framkvæmdum á samþykktu stígakerfi bæjarins. Loftgæði á Akureyri eigi aldrei að fara yfir heilsuverndarmörk, börn, aldraðir og lungnasjúklingar eigi ekki að þurfa að sleppa útiveru vegna slæmra loftgæða. Nauðsynlegt sé að gætt sé að jafnræði barna í sveitarfélaginu og stefna þarf að gjaldfrjálsum skólamáltíðum og tekjutengingu leikskólagjalda. Einnig þurfi  að auka valfrelsi barna um hvers kyns mat þau borða í skólum og leikskólum og leggja þarf meiri áherslu á grænkerafæði. Einnig þurfi að huga að framtíðarmönnun leikskóla sveitarfélagsins, svo fátt eitt sé nefnt.