Hann segir að stríðið í Úkraínu sýni að yfirráðum Vesturlanda sé að ljúka en Kína sé í sókn og sé að tryggja sér stöðu sem stórveldi í samvinnu við Rússland.
Þetta kom fram í ræðu sem Blair flutti á ráðstefnu um öryggismál, sem fór fram í Ditchley Park nærri Lundúnum á laugardaginn. Ræðan ber fyrirsögnina: „Eftir Úkraínu: Hvað geta vestrænir leiðtogar lært?“
Hann sagði að heimurinn standi á krossgötum. Það megi líkja stöðunni núna við lok síðari heimsstyrjaldarinnar eða hrun Sovétríkjanna. En að þessu sinni séu Vesturlönd ekki að fara að styrkja stöðu sína. „Við nálgumst endalok yfirburða Vesturlanda á pólitíska og efnahagslega sviðinu,“ sagði hann.
Hann sagði að stærsta landfræðipólitíska áskorunin á öldinni sé vegna Kína, ekki Rússlands. Hann segir að stríðið í Úkraínu hafi sýnst að Vesturlönd geti ekki treyst því að Kína bregðist við á „hátt sem okkur finnst skynsamlegur“.
Hann sagði einnig að Vesturlönd eigi ekki að láta það gerast að Kína taki fram úr þeim hernaðarlega. Þau verði að auka útgjöld sín til varnarmála og viðhalda hernaðarlegum yfirburðum sínum. Bandaríkin og bandamenn þeirra verði að vera undir það búin að geta tekist á við og haft betur í öllum þeim deilum eða átökum sem upp kunna að koma.
