Það var heimsfaraldur kórónuveirunnar og þær ferðatakmarkanir sem honum fylgja sem settu mark sitt á reksturinn á síðasta ári, sérstaklega á fjórða ársfjórðungi. Sætaframboð dróst saman um 95%.
Í uppgjöri félagsins, sem var birt í Kauphöllinni í gærkvöldi, kom fram að á árinu hafi heildartekjurnar lækkað um 81% og hafi verið 8,2 milljarðar. Tekjur af fraktflutningum jukust um 48% á milli ára.
Í árslok var eigið fé félagsins 29,7 milljarðar.
Félagið reiknar með að flug fari að aukast frá og með öðrum ársfjórðungi en í tilkynningunni segir Bogi að enn ríki veruleg óvissa. „Þróun faraldursins, dreifing bóluefna og hvernig reglur á landamærum þróast mun skipta sköpum varðandi framhaldið. Við erum hins vegar hóflega bjartsýn að geta aukið flug frá og með öðrum ársfjórðungi þessa árs,“ segir hann.
„Með skýrri framtíðarsýn, réttri forgangsröðun og samvinnu mun félagið koma sterkara til baka þegar flug og ferðalög glæðast á ný,“ segir hann í lok tilkynningarinnar.
