Jóhann Þorvarðarson, pistlahöfundur á Miðjunni, kallar Ásgeir Jónsson seðlabankastjóra vindhana í nýjasta pistli sínum á Miðjunni sem ber yfirskriftina: Vindhaninn afhendir 120 milljarða gjöf.

„Ásgeir seðlabankastjóri lét hafa eftir sér í dag að 10% veiking krónunnar væri ekki mikið. Í síðustu viku sagði hann 5% veikingu væri ekki mikið. Bleik er brugðið og bíður kvíðafullur eftir að heyra hvað Ásgeir segir næst,“ segir Jóhann í pistlinum. „Miðað við umfang efnahagslífsins árið 2019, óbreytt innflutningsverð og þessa 10% veikingu krónunnar þá  er verið að færa 120 milljarða frá almenningi til ferðaþjónustunnar og stórríkrar útgerðar og fiskvinnslu.“

Hann segir þettta vera samtals 521.000 krónur á hvern starfandi mann á ári eða 43.000 krónur á mánuði. „Ásgeir var hróðugur við sama tilefni þegar hann upplýsti að Seðlabankinn hafi ekki gripið inn í gjaldeyrismarkaðinn til að vinna gegn veikingu krónunnar þrátt fyrir púður upp á 800 milljarða. Hann er bara dús með gang mála.“

Þá spyr Jóhann hvar stjórnarandsstaðan og launþegahreyfingin séu. „Kjarasamningar stefna í uppnám þrátt fyrir lækkun vaxta. Já meðan ég man, lífeyrissjóðirnir eru ekki að lækka vexti nema pínu-pons!“