Í kjölfar snjóflóðanna á Vestfjörðum í síðustu viku hefur komið í ljós að enn er ólokið framkvæmdum við varnargarða á átta stöðum á landinu sem teljast í C-flokki, sem eru talin hættulegustu svæðin. Uppbyggingu átti að ljúka árið 2010, en mun taka 50 ár í viðbót með sama hraða og sama fjármagni, ef miðað er við síðustu ár.
Hafa stjórnvöld verið gagnrýnd harðlega fyrir að standa ekki betur að málum, en Sigurður Ingi Jóhannsson, sveitarstjórnar- og samgönguráðherra, sagði í gær að ríkissjóður skuldaði Ofanflóðasjóði um 15 milljarða króna.
Sjá nánar: Átta bæir enn á snjóflóðahættusvæði – 60 árum á eftir áætlun
Jón Þórisson, einn ritstjóra Fréttablaðsins, skrifar um þetta í leiðara í dag og minnir á að ítrekað hafi verið bent á þetta um árabil og vitnar í orð stjórnarformanns Ofanflóðasjóðs, Halldórs Halldórssonar, að við sem þjóð munum aldrei fyrirgefa okkur ef líf tapist vegna hamfara á þessum skilgreindu svæðum:
„Hann segist hafa bent ítrekað á þetta um árabil. Nefndarmaðurinn hlýtur að velta fyrir sér stöðu sinni í nefndinni ef ekki er hlustað á hann árum saman. En það leysir engan vanda. Meginatriðið er að koma þessum vörnum í lag og nýta til þess fé sem innt hefur verið af hendi en safnað upp. Ef til vill er þó vandinn sá að féð hefur verið nýtt í rekstur ríkissjóðs, þó að það kunni að vera sérgreint í bókhaldi hans,“
segir Jón.
Hann segir það svik við þjóðina hvernig staðið hafi verið að málum:
„Það er gagnrýnivert að aðeins þriðjungur þess, sem innheimt er sérgreint í þetta verkefni, skuli vera varið til þess. Það er til skilgreining á þeirri aðstöðu að innheimta fé í eitt og verja því í annað. Það teljast svik. Ekki bara við þá sem á þessum stöðum búa, né bara við þá sem inna gjaldið af hendi. Það teljast svik við alla landsmenn,“
segir Jón.
Sjá einnig: Segir hneyksli að peningar Ofanflóðasjóðs hafi ekki verið nýttir í ofanflóðavarnir
