Ársreikningur Pírata fyrir árið 2018 hefur loksins verið birtur, en Píratar hafa verið gagnrýndir fyrir að vera ekki með opið bókhald síðustu ár. Unnar Þór Sæmundsson, gjaldkeri Pírata, greinir frá þessu á Facebook í dag:
„Jæja eftir svefnlausar nætur og þrotlausa vinnu þá er ársreikningur Pírata tilbúinn(reyndar fyrir nokkrum dögum). Það hefur varla farið framhjá neinum innan Pírata að bókhaldið okkar hefur ekki verið opið síðan árið 2016 og þá fyrir árið 2015. Þegar ég bauð mig fram til setu í framkvæmdarráði í lok árs 2018 þá var það eitt af mínum helstu áheyrslum að opna bókhaldið eins og lög félagsins gera ráð fyrir, ég verð að viðurkenna verkefnið var bæði stærra og flóknara en ég hefði getað ímyndað mér. En ég er mjög stoltur að tilkynna það hér að bókhald Pírata fyrir árið 2018 hefur verið opnað og er aðgengilegt í gegnum heimasíðu Pírata undir opið bókhald.“
Píratar fengu rúmar 70 milljónir í framlög á síðasta ári, en rekstrargjöld námu rúmum 83 milljónum. Tapið nam því um 12.5 milljónum.
Framlögin eru að langstærstum hluta styrkur ríkissjóðs til stjórnmálaflokkanna.
Skuldir flokksins nema um 22.5 milljónum í fyrra.
Píratar fengu enga styrki frá fyrirtækjum eða einstaklingum árin 2017-2018, samkvæmt ársreikningnum, sem nálgast má hér.
