Vigdís Hauksdóttir, borgarfulltrúi Miðflokksins, íhugar að leggja fram kæru á grunni meiðyrðalöggjafarinnar, vegna eineltiskvartana Helgu Bjargar Ragnarsdóttur í sinn garð, líkt og Eyjan hefur fjallað um í dag. Vigdís hyggst ekki taka þátt í rannsóknarferlinu sem eineltis- og áreitnisteymi Reykjavíkurborgar hefur ákveðið að ráðast í, eftir kvartanir Helgu Bjargar, sem sakar Vigdísi um að hafa lagt sig í einelti, þrátt fyrir að samskipti þeirra hafi verið afar takmörkuð.
Vigdís sagði við Eyjuna að hún ætli að ráðfæra sig við lögmann þegar fundi borgarráðs ljúki:
„Auðvitað tek ég ekki þátt í þessum sirkus – enda skortir alla lagastoð fyrir því að fara með málið í þennan farveg – ég leggst ekki á sama plan og þetta fólk,“
Vigdís nefnir á Facebook að stríðshanskanum hafi verið kastað:
„Hvað kostar þessi sirkús borgarbúa? Hvernig á ég að geta lagt í einelti konu sem ég hef nánasta aldrei hitt? Stríðshanskanum hefur enn á ný verið kastað – þetta er stríð embættismanna gegn lýðræðiskjörnum fulltrúum.Eigi þeir eitthvað vantalað við mig – þá bendi ég þeim á lögformlegt ferli sem er dómstólaleiðin. Ég er að íhuga mína stöðu á grunni meiðyrðalöggjafarinnar – borgarráðsfundur stendur yfir og eru nokkrir niðurlútir eftir eldræðu mína frá í morgun.“
Kobrún Baldursdóttir, borgarfulltrúi Flokks fólksins, bendir á að þó svo að Vigdís sé til rannsóknar hjá eineltisteymi Reykjavíkurborgar, þurfi Vigdís ekki að taka þátt í því ferli frekar en hún vilji.
„Kjörinn fulltrúa er hvorki hægt að reka né áminna. Þess utan er ekki hægt að þvinga nokkurn mann kjörinn fulltrúa eða starfsmann að taka þátt í rannsóknarferli eins og þessu ef hann ekki vill það. Þess vegna er það einfaldlega þannig að telji starfsmaður eða hver annar að kjörinn fulltrúi hafi brotið á sér þá er bara ein leið fær og það er dómstólaleiðin.“
Sjá nánar: Ráðhúsið leikur á reiðiskjálfi:„Svo þarf ég að sitja andspænis þessari konu“
