Þorvaldur Gylfason, hagfræðiprófessor við Háskóla Íslands og fyrrum stjórnlagaráðsmaður, viðhafði nokkuð þung orð um Sjálfstæðismenn í athugasemd á facebook á dögunum, hvar hann líkti þeim við nasista sem auglýstu gasgrill. Andrés Magnússon, blaðamaður Viðskiptablaðsins, vekur athygli á ummælunum á facebooksíðu sinni, en athugasemd Þorvaldar var við færslu Illuga Jökulssonar, sem er svohljóðandi:

„Sjálfstæðisflokkurinn skipulagði 2012 villimannlegt málþóf gegn nýrri og lýðræðislegri stjórnarskrá. Sjálfstæðisflokkurinn skipulagði nú ömurlegt og lágkúrulegt málþóf gegn kosningarétti ungs fólks. Getur Sjálfstæðisflokkurinn í raun og veru talist lýðræðislegur flokkur?“

Þorvaldur sagði í athugasemd við færslu Illuga:

„Sjálfstæðismenn sem tala um lýðræði orka nú orðið á mig eins og nasistar að auglýsa gasgrill.“

Andrés Magnússon segir í háði um athugasemd Þorvalds:

„Hér er mælt af akademískri yfirvegun og stakri smekkvísi. Hvar væri þjóðmálaumræðan án slíkra radda?“

Aðspurður sagðist Þorvaldur lítið vilja tjá sig um ummælin, aðeins að þau hefðu verið sögð í „gríni.“

Nokkur umræða skapast á spjallþræðinum hjá Andrési um málið, hvar þjóðþekktir menn fordæma, eða verja ummæli Þorvaldar.

Eyþór Arnalds, borgarstjóraefni Sjálfstæðisflokksins lætur sér nægja að segja „æ“ við orðum Þorvaldar, meðan Egill Helgason segir ummælin „ömurleg“ og „heimskuleg.“

Jón Kristinn Snæhólm segir fullyrðinguna „galna“ sem sýni „takmarkaðan skilning“ Þorvaldar á stjórnmálum almennt.

Stórsöngvarinn Björgvin Halldórsson segir: „don´t get me started.“

Þeir sem verja ummælin er til dæmis Hjálmar Hjálmarsson, leikari og fyrrum bæjarfulltrúi í Kópavogi, sem segir ummælin „fyndin“. Þeir Jón Kristinn Snæhólm skeggræða síðan skilgreiningar á húmor um nokkra hríð, án þess að komast að niðurstöðu.

Einar Steingrímsson, stærðfræðingur, segir ummælin smellin og „spot on“  þar sem Sjálfstæðisflokkurinn „fyrirlíti lýðræði.“