Sveinn Hjörtur Guðfinnsson, sem skipar 3. sæti lista Miðflokksins í Reykjavík, er gagnrýninn á störf Barnaverndar Reykjavíkur í pistli sem hann birtir á Facebook síðu sinni. Þar gerir hann athugasemd við að í nefndina séu pólitískt skipaðir fulltrúar og gerir Dag B. Eggertsson ábyrgan:

„Æðsti embættismaður Barnaverndar Reykjavíkur er borgarstjóri. Með pólitískum hætti eru nefndarmenn ráðnir. Í nefndinni eru m.a. tveir aðilar sem eru samflokksmenn borgarstjóra og félagar hans. Einnig eru aðilar sem starfað hafa með og fyrir Sjálfstæðisflokkinn. Ekki legg ég mat á faglega getu nefndarmanna, en geri athugasemd við það að svo mikilvæg nefnd, sem Barnaverndarnefnd Reykjavíkur er, séu ráðnir pólitískir félagar. Barnaverndarnefnd Reykjavíkur á að taka af allan vafa um að hún sé til starfa sinna gild til verka eða ekki. Hún verður að vera skipuð afar faglegum einstaklingum sem verða að vera lausir við pólitísk tengsl,“

 

segir Sveinn Hjörtur meðal annars.
Hann segir við Fréttablaðið að kerfið sé „gallað“ og vísar í fréttaskýringaþáttinn Kveik, sem var með umfjöllun um störf Barnaverndarnefndar Reykjavíkur.

Þá segir Sveinn í pistli sínum:

„Í einu orði sagt er dapurt að heyra hver staðan er. Af þeim 20 málum nefndarinnar voru 19 sem Barnaverndarstofa þurfti að gera athugasemdir við málsmeðferð þeirra.“