Benedikt Jóhannesson fjármála- og efnahagsráðherra segir það hlutverk ríkisstjórnarinnar að hugsa um hag heildarinnar og ef að það ætti að verða við öllum kröfum um breytingar á fjármálaáætlun ríkisstjórnarinnar til 2022 þá myndi ríkið ekki ná endum saman.

Yfir 100 umsagnir um fjármálaáætlunina hafa borist og verið birtar á vef Alþingis, flestar mjög neikvæðar. Telja aðilar í ferðaþjónustu að hækkun á virðisaukaskatti á greinina sé ótæk en Benedikt hefur sagt að það komi ekki til greina að endurskoða þá ákvörðun og segir hann í samtali við Morgunblaðið í dag að hann heyri það víða að aðrir fagni því að nú muni ferðaþjónustan sitja við sama borð og aðrir.

Landspítalinn hefur gagnrýnt fjármálaáætlunina harðlega og var þeirri gagnrýni svarað á vef fjármálaráðuneytisins í gær, telur ráðuneytið að fullyrðingar spítalans um að samanburður við útgjöld Norðurlanda til heilbrigðismála standist ekki skoðun séu rangar. Útgjöldin séu sambærileg og ef þjónustan væri lakari þá væri öðru um að kenna en fjárframlögum ríkisins:

Landspítalinn tekur aukningu hjá okkur og ber saman við sína ósk um fjármagn og telur að aukningin sé niðurskurður af því að ekki er orðið við öllum óskum,

segir Benedikt í samtali við Morgunblaðið í dag. Segir hann jafnframt að það sé áhugavert að gagnrýnin snúist að því að útgjöldin í fjármálaáætluninni séu of lítil og tekjuáformin séu of mikil:

Ef við ætluðum að verða við öllum kröfum, ná endar ekki saman.