Mikil umræða hefur verið í samfélaginu um frumvarp fjármálaráðherra um jafnlaunavottun. MMR birti í dag niðurstöður könnunar sem gerð var á afstöðu fólks til jafnlaunavottunar, það er að fyrirtækjum með fleiri en 25 starfsmenn verði skyldug til að fá jafnlaunavottun. Könnunin var framkvæmd dagana 11.-26. apríl og voru svarendur 926, 18 ára og eldri. Helstu niðurstöður könnunarinnar eru að meirihluti Íslendinga er hlynntur því að fyrirtæki verði gerð til að öðlast slíka vottun.
Rúm 60% sögðust frekar eða mjög fylgjandi lögum um jafnlaunavottun en aðeins 20,8% voru því frekar eða mjög andvíg. 19,2% voru hvorki með né á móti.
Mikill munur á afstöðu eftir kyni
Karlar voru mun líklegri en konur til að vera andvígir jafnlaunavottun. Af körlum voru 19% mjög andvígir slíku en aðeins 5% kvenna svöruðu á þá leið.
Heil 75% kvenna voru hlynnt jafnlaunavottun og af þeim voru 47% mjög fylgjandi. 46% karla voru fylgjandi, þar af 26% mjög fylgjandi
Munurinn var líka talsverður eftir búsetu. Af íbúum höfuðborgarsvæðisins voru 40% mjög fylgjandi jafnlaunavottun en 29% af þeim sem búa á landsbyggðinni.
Það kemur eflaust ekki á óvart að stjórnendur og æðstu embættismenn voru andsnúnastir jafnlaunavottun eða 42% þeirra. Af þeim voru 25% mjög andvíg og 17% frekar andvíg.
Námsmenn (69%) og sérfræðingar (68%) voru mjög hlynntir jafnlaunavottun.
Stuðningsfólk Sjálfstæðis- (41%) og Framsóknarflokks (45%) reyndust líklegri en stuðningsmenn annarra flokka til að vera andvíg jafnlaunavottun. Stuðningsfólk Vinstri grænna (78%) reyndust jafnframt líklegri en stuðningsfólk annarra flokka til að vera fylgjandi slíku.
