Lilja Dögg Alfreðsdóttir varaformaður Framsóknarflokksins og Eygló Harðardóttir þingmaður taka ekki undir með Gunnari Braga Sveinssyni þingmanni að staðan innan Framsóknarflokksins sé „djöfulleg“ og forysta flokksins ætti að íhuga stöðu sína alvarlega. Gunnar Bragi sagði í morgun að töluverð óánægja sé innan flokksins með formannskjörið á flokksþingi síðasta haust þar sem Sigmundur Davíð Gunnlaugsson laut í lægra haldi fyrir Sigurði Inga Jóhannssyni:

Það var farið í ákveðna vegferð á síðasta flokksþingi, þar sem að þeir sem fyrir henni stóðu töldu að flokkurinn myndi uppskera vel, en við sáum nú ágætlega hvernig það gekk allt saman,

sagði Gunnar Bragi. Eygló Harðardóttir segir við Eyjuna að henni þyki leitt að þetta sé upplifun Gunnars Braga og telur hún þetta ekki rétt mat á stöðu flokksins. Lilja Dögg Alfreðsdóttir varaformaður segir í samtali við Eyjuna að hún sé ekki sammála því að staða flokksins sé djöfulleg:

„Hins vegar er það auðvitað þannig að staða flokksins eftir síðasta flokksþing var nokkuð vandsöm vegna þess að það var skipt um formann nokkrum vikum fyrir kosningar. Og flokkurinn skiptist í tvær fylkingar við formannskjörið. Það gefur auga leið að það tekur tíma fyrir stjórnmálaflokk að vinna úr því,“

segir Lilja Dögg. Búið sé að boða til miðstjórnarfundar 20. maí næstkomandi þar sem farið verði yfir stöðu flokksins og hlakkar hún til að taka þátt í þeim umræðum:

Ég held að við munum styrkja okkur á komandi kjörtímabili.

Verður hægt að sætta þessar tvær fylkingar innan flokksins?

Við munum fara yfir stöðuna, hvað hægt sé að gera betur, hvernig sé hægt að styrkja okkur og við sjáum svo hvernig miðstjórnarfundurinn kemur út.