„Fyrir 30 árum – bjó ég í Kaupmannahöfn og var þar við nám – akkúrat þennan dag 28. nóvember fékk ég erfiðasta símtal ævinnar, þar sem mér var tilkynnt um að foreldrar mínir hefðu látist í bílslysi í Svínahrauni. Veröldin varð dökk, lífið umsnérist í einni hendingu.“

Þetta segir Sigurður Ingi Jóhannsson formaður Framsóknarflokksins á Facebook. Þar minnist hann sinnar erfiðustu lífsreynslu, að missa báða foreldra sína í bílslysi. Sigurður Ingi deilir jafnframt frétt frá Samgöngustofu þar sem þeirra er minnst sem hafa látist í umferðinni en um 1500 hafa dáið í umferðarslysum á 100 árum. Sigurður Ingi segir:

Lán okkar systkina var kærleikur og umhyggja fjölskyldu, vina og samfélagsins þar sem við ólumst upp. Án alls þess stuðnings sem allt þetta fólk veitti okkur hefði verið erfitt að komast í gegnum sorgina og alls þess sem beið okkar. Fyrir það verður aldrei fullþakkað. Mér varð hugsað til þessa þegar ég keyrði Svínahraunið í morgun. Foreldrar mínir voru yndislegt fólk sem við söknum. Blessuð sé minning þeirra.

Þá skorar Sigurður Ingi á fólk að fara farlega og passa uppá hvort annað:

Um 1500 manns hafa látist í umferðinni frá því að bílaöldin hófst 1914. Veturinn og myrkrið er oft hættulegasti tíminn. Förum því varlega kæru vinir og pössum hvert annað.