Sigurður Ingi Jóhannsson formaður Framsóknarflokksins segir að það sé ekki nein flokksklíka í Framsóknarflokknum og það sé enginn sem stjórni flokknum nema flokksmenn sjálfir. Segir Sigurður Ingi í viðtali í þættinum Bítið á Bylgjunni í morgun að það sé ekkert að marka fullyrðingar þeirra sem segja Framsóknarflokkinn undir hæl Þórólfs Gíslasonar kaupfélagsstjóra í Skagafirði, Sigurður Ingi segir að hann hafi sjálfur verið í flokknum í mörg ár án þess að heyra minnst á Þórólf.

Sigmundur Davíð Gunnlaugsson og Gunnar Bragi Sveinsson, sem yfirgefið hafa Framsóknarflokkinn fyrir Miðflokkinn, hafa haldið því fram að það sé klíka sem stjórni Framsóknarflokknum, klíka sem hafi steypt Sigmundi Davíð af formannsstóli í fyrra og hafi nú síðast reynt að fella Gunnar Braga úr oddvitasætinu í Norðvesturkjördæmi.

„Ég hef heyrt svona umræðu og hef heyrt alls konar svona áður,“ segir Sigurður Ingi. Aðspurður hvort það sé flokksklíka í Framsóknarflokknum segir Sigurður:

Nei. Ekki að það séu einhverjir menn úti í bæ sem stjórni flokknum. Ég var búinn að vera á þingi í þónokkur ár án þess að hafa hitt nokkurn af þessum mönnum sem sagt er í fjölmiðlum að stjórni flokknum.

Sigurður Ingi segir ekki að hann skilji hvað Gunnar Bragi sé að tala um:

Ég skil það ekki. Ég hef verið á þessum fundum, þar stendur hver upp á fætur öðrum og segir: „Ég er flokkseigandi. Ég er búinn að vera í grasrótinni í 20 ár, 30 ár, 40 ár, ég er flokkseigandi“. Fólk gleðst yfir þessu. Ég fullyrði að það eru engir kallar á einhverri skrifstofu úti í bæ sem stjórna Framsóknarflokknum. Hafi það verið einhverntímann þá þekki ég ekki til þess en það er ekki nú. Af og frá.