Bæjarfélagið á Raufarhöfn er lamað eftir að öllum starfsmönnum saltfiskverkunarinnar Hólmsteins Helgarsonar ehf., HH, á Raufarhöfn var sagt upp. HH fékk ekki 100 tonna aukakvóta, sem hugsaður er til að styrkja veikar byggðir.

Gunnar Finnbogi Jónasson verkstjóri hjá HH sagði í samtali við DV í gær að fólk sé gapandi vegna ákvörðunarinnar. „Við vorum að vonast til að fá einhverja hlutdeild í þessum kvóta,“ sagði Gunnar. Hjá HH starfa sjö manns en það gerir út tvo báta frá Raufarhöfn, sem hefur mjög átt undir högg að sækja undanfarin ár, eins og fleiri þorp á norðausturhorni landsins. Samkvæmt upplýsingum frá Byggðastofnun, sem RÚV greinir frá í dag, var það metið sem svo að úthlutun til fyrirtækisins myndi efla atvinnulífið á Raufarhöfn og styrkja starfsemi þess í þorpinu enn frekar.

Friðgeir Gunnarsson var einn þeirra sem missti vinnuna við fiskvinnslu, segir hann í samtali við Eyjuna það vera sárt að missa vinnuna. Honum líði hvergi betur en á Raufarhöfn og segir hann tíma til að íbúarnir, sem eru 190, standi saman.

Friðgeir segist vera með tárin í augunum af reiði vegna stöðunnar:

Ástæðan fyrir því að ég er að missa vinnuna er svo fáránleg að hálfa væri hellingur, ég segi bara að það eru ákveðnir menn sumsstaðar sem hafa svo mikil völd, eru með puttana í öllu og svífast einskis!

Nú sé stefnan sett á að halda íbúafund í bænum þar sem þess verðu krafist að menn komi og veiti íbúum svör. Friðgeir vinnur með ungu fólki sem kemur til með að flytja í burtu, segir hann það grafalvarlegt fyrir lítið samfélag á landsbyggðinni:

Var ekki verið að tala um brothættur byggðir og reynt að fá allt unga fólkið heim? Þetta er ekki leiðin til þess að gera það!,

segir Friðgeir reiður.