Þing­flokkur Pírata hefur lagt fram frum­varp um breyt­ingar á lögum um kjara­ráð, vilja Píratar að kjara­ráð kveði upp nýjan úrskurð sem feli í sér launa­lækkun Alþing­is­manna og ráð­herra sem sam­svari því að laun þeirra fylgi almennri launa­þróun frá 11. júní 2013.

Í fréttatilkynningu sem Píratar sendu frá sér fyrir stuttu bjóða þeir öðrum þingmönnum að vera með í málinu. Vísað er til orða Gylfa Arnbjörnssonar forseta Alþýðusambandsins frá því í morgun um að forsendur kjarasamninga Samtaka atvinnulífsins og ASÍ séu í hættu vegna ákvörðunar kjararáðs að hækka laun þingmanna og ráðherra. Eftir viku lýkur mati á for­sendum þess að segja upp kjara­samn­ingum ASÍ og SA.

Al­þingi hefur 7 daga til að bregð­ast við með góðu for­dæmi og fyr­ir­skipa kjara­ráði að lækka laun þing­manna, ráð­herra og ann­arra sem heyra undir ráðið til sam­ræmis við launa­þróun frá 2013 sem kjara­samn­ingar flestra laun­þega miða við. Þetta frum­varp gerir það,

segir í fréttatilkynningu Pírata. Samkvæmt frumvarpinu verður Kjararáði gert samkvæmt lögum að kveða upp nýjan úrskurð fyrir 28. febrúar, í næstu viku, sem feli í sér launalækkun þingmanna og ráðherra, en ekki forseta Íslands.