Dómstóll í Georgíu í Bandaríkjunum hefur dæmt fyrirtækið Bayer til að greiða manni 2,1 milljarða dollara í bætur. Maðurinn höfðaði mál á hendur fyrirtækinu og hélt því fram að hann hefði fengið krabbamein vegna þess að hann notaði illgresiseyði, sem innihélt glýfosfat, frá fyrirtækinu.

Bayer, sem er þýskt, framleiðir lyf og ýmis önnur efni, þar á meðal illgresiseyðinn Roundup en það var hann sem maðurinn notaði. Fyrirtækið segist ætla að áfrýja dómnum.

Fyrirtækið hefur fram að þessu greitt um 10 milljarða í málum, þar sem það hefur gert sátt við málshöfðendur, þar sem því hefur verið haldið fram að glýfosfat valdi krabbameini og hafi valdið krabbameini í notendum Roundup. Fyrirtækið stendur fast á að efnið sé öruggt ef það er meðhöndlað á réttan hátt og segir að það valdi ekki krabbameini.

Roundup er mikið notað í Evrópu en sumar útgáfur þess innihalda ekki lengur glýfosfat en aðrar, ætlaðar fagfólki, innihalda margar hverjar efnið.

60.000 aðrar málshöfðanir bíða Bayer sem hefur lagt um 6 milljarða dollara til hliðar til að mæta kostnaðinum við þær. Fyrirtækið eignaðist Roundup þegar það tók bandaríska fyrirtækið Monsanto yfir 2018.

Bayer segir í yfirlýsingu að fyrirtækið sé ósammála niðurstöðu kviðdómsins sem stangist á við flest vísindaleg gögn og heimildir eftirlitsstofnana til að nota efnið.