Fjáröflunar- og vitundarvakning Krafts 2025 ber yfirskriftina „Ég á lítinn skrítinn skugga – Lífið er núna“ og vísar til þeirra langtímaáhrifa sem það hefur að greinast ungur með krabbamein, ekki bara á þann sem greinist heldur einnig á aðstandendur, en um 70 ungir einstaklingar greinast á ári hverju hér á landi.

„Hvort sem við höfum greinst með krabbamein, einhver okkur nákominn eða við orðið fyrir öðrum áföllum á lífsleiðinni, þá eigum við öll okkar skugga sem er alltaf til staðar – Stundum er skugginn stór, stundum verður hann að daufum útlínum og stundum hverfur hann alveg undir skósólana. Hann er þögull ferðafélagi og partur af lífi okkar allra.“

Herferðin er jafnframt stærsta fjáröflun sem félagið fer í og hófst í gær með opnunarhátíð í verslun Rammagerðarinnar á Laugavegi. Auglýsing vitundarvakningarinnar 2025 var frumsýnd og nýja Lífið er núna húfan kynnt til leiks.

Lífið er núna húfan er til sölu til 12. febrúar.
Lífið er núna dagurinn
„Þann 30. janúar hvetjum við alla og fyrirtæki til að halda hátíðlegan Lífið er núna daginn en tilgangur hans er að minna fólk á að staldra við og njóta líðandi stundar. Ekki bíða eftir mómentinu heldur skapaðu það þegar þig langar til! Við hvetjum vinnustaði til að brjóta upp hversdagsleikann með því til dæmis að hafa hrós-dag, vinaleik, mæta í sínu fínasta pússi eða bjóða upp á appelsínugular veitingar, hvetja starfsfólk til að fara í göngutúr í hádeginu og gera sér dagamun og huga að heilsunni. Í tilefni dagsins hvetjum við alla og fyrirtæki til að gera appelsínu gula litnum okkar hátt undir höfði, brjóta upp daginn með appelsínugulum kaffiveitingum, skreyta heima og kaffistofuna í vinnunni, klæðast appelsínugulu og skapa minningar með sínu besta fólki.“